Կորոնավիրուսը լուրջ սպառնալիք կարող է դառնալՀայաստանի համար, այն առավել վտանգավոր է, քան Էբոլան
Հանրային կառավարման մասնագետ Սոսի Թաթիկյանը ֆեյսբուքյան իր էջում գրել է. «Բոլորին խնդրում եմ կորոնավիրուսի տարածման` արդեն առկա իրողությանը և Հայաստան ներթափանցման հնարավորությանը շատ լուրջ վերաբերվել:Ես 2017 թ. սեպտեմբերին ՀՀ Անվտանգության Խորհրդի աշխատակազմին ներկայացրեցի ՄԱԿ-ի մեթոդոլոգիան և իմ փորձն ազգային անվտանգության ռազմավարությունների մշակման և սպառնալիքների գնահատման ոլորտում` ելնելով մի քանի երկրների կառավարություններին այդ գործում օգնած լինելուցս: Դրանց թվին էին պատկանում նաև Էբոլայի տարածման հարևանությամբ գտնվող երկրներ` այդ հիվանդության համաճարակի տարիներին: Ինչպես նշեցի պրեզենտացիայիս ժամանակ, թեև Հայաստանը հիմնականում հեռու է գտնվել համաճարակների տարածման օջախներից, սակայն համաճարակի հնարավորությունը երբեք չի կարելի բացառել, քանի որ այն միշտ անսպասելի է: Հետևաբար, պետք է կիրառել մաքսիմալ կանխարգելիչ միջոցներ:
Կորոնա վիրուսն առավել վտանգավոր է, քան Էբոլան, քանի որ ի տարբերություն նախորդի, միանշանակ տարածվում է ոչ միայն հիվանդի, մահացածի կամ նրա իրերի հետ ֆիզիկական շփման, այլև նաև օդակաթիլային ճանապարհով: Բացի այդ, Կորոնայի տարածումը համընկավ Հայաստանի ու Չինաստանի միջև վիզաների ռեժիմի վերացման հետ: Չինաստանի ու Հայաստանի միջև մարդկանց հոսքը նշանակալից է, եթե էբոլայի դեպքում այն աննշան էր: Համաճարակն արդեն թափանցել է երեկվա դրությամբ առնվազն 16 երկիր, այդ թվում, Քալիֆորնիա հայաշատ նահանգ, Ֆրանսիա, Իտալիա, Միացյալ Թագավորություն, Գերմանիա ու արդեն նաև՝ Ռուսաստան: Air France-ը և այլ ավիաընկերություններ դադարեցրել են չվերթները Չինաստան: Այնպես որ, այնքան էլ չեմ հասկանում, թե Հայաստանն ինչպես կարող է համարվել այդ համաճարակի տարածման համար ցածր ռիսկայնության երկիր:
Շաբաթ օրվա գրառմանս մեջ նկարագրեցի այն մինիմալ միջոցառումները, որոնք կիրառվում էին Աֆրիկայի բոլոր երկրների օդանավակայաններում էբոլայի ժամանակ: Ինչքան ինձ հայտնի է, մեզանում դրանք դեռևս չեն կիրառվում կորոնայի պարագայում: Այս շաբաթ Չինաստանից Հայաստան ժամանած հայերն ինքնակամ են գնացել հիվանդանոց ու ստուգվել: Մյուս շաբաթ ճանապարհորդելու եմ և հույս ունեմ, որ այդ միջոցները կտեսնեմ:
Սա կարող է դառնալ ազգային անվտանգության լուրջ սպառնալիք Հայաստանի նման փոքրիկ երկրի համար:
Հ.Գ. հենց նոր որոշում ընդունվեց. «Հաշվի առնելով կորոնավիրուսով պայմանավորված համաճարակային իրավիճակը՝ 2020թ. փետրվարի 1֊ից մինչ մարտի 31֊ը ժամանակավորճապես կասեցվում է Չինաստանի Ժողովրդական Հանրապետության քաղաքացիների համար Հայաստանի Հանրապետություն մուտքի վիզայի գործող ազատ ռեժիմը»»:
