Հին ժողովրդական միջոց է առաջարկել նախագահը.Թուրքմենստանում կորոնավիրուսով հիվանդության ոչ մի դեպք
Թուրքմենստանի նախագահ Գուրբանգուլի Բերդիմուհամեդովը կառավարության նիստում քաղաքացիներին խորհուրդ է տվել վիրուսներից պաշտպանվել հին ժողովրդական միջոցով՝ հարմալի ծխով, հայտնում է «ՌԻԱ Նովոստի»-ն:Թուրքմենները լայնորեն կլիրառում են հարմալով ծխահարումը, ըստ հավատալիքների՝ այն պաշտպանում է հիվանդություններից:
Բերդիմուհամեդովը շեշտել է, որ թուրքմենների նախնիները հազարամյակներ շարունակ ստեղծել են վնասակար սովորություններին հակազդելու եւ տարբեր ինֆեկցիոն հիվանդությունների կանխարգելման ազգային մեթոդներ, որոնք ապացուցել են իրենց արդյունավետությունը: «Մեր իմաստուն նախնիները հաստատակամորեն հետեւել են ավանդույթներին՝ հարմալի ծխով ծխահարել են կարեւոր իրադարձոււթյունների ժամանակ՝ լինի նոր տուն տեղափոխվել, թե ամուսնություն, ինչպես նաեւ երբ տարվա որոշակի եղանակին առաջանում էին ինֆեկցիոն հիվանդություններ»,- ասել է Բերդիմուհամեդովը:
Պետության ղեկավարը նշել է, որ սուրբ բույս համարվող հարմալով ծխահարումը ներկայումս շարունակվում է: Նրա խոսքով՝ այս բույսի ծուխը խոչընդոտում է մարդու օրգանիզմ տարբեր վիրուսների ներթափանցումը: Թուրքմեն առաջնորդը շեշտել է այս ժողովրդական ավանդույթի հատուկ նշանակությունը, նրա կարծիքով՝ այդ միջոցները պետք է ուղեկցվեն զանգվածային բացատրական աշխատանքով:
Թուրքմենստանում չի գրանցվել նոր տեսակի կորոնավիրուսով հիվանդության ոչ մի դեպք:
Առողջապահության համաշխարհային կազմակերպությունը մարտի 11-ին COVID-19 նոր կորոնավիրուսի բռնկումը համավարակ է ճանաչել: Վարակման դեպքեր են գրանցվել ավելի քան 120 երկրներում: Ըստ պաշտոնական տեղեկությունների՝ աշխարհում ընդհանուր վարակվել է արդեն ավելի քան 130 հազար մարդ, մեծ մասն առողջացել է, բայց 4,9 հազարից ավելին մահացել է:
