Սեռական բռնության, ռետինե մահակներով բռնաբարության, խոշտանգումների վերաբերյալ հարյուրավոր ապացույցներ ունի ՄԱԿ-ը
ՄԱԿ-ի փորձագետներին հայտնի է Բելառուսում նախագահական ընտրություններից հետո ձերբակալությունների ժամանակ մարդկանց խոշտանգումների և դաժան վերաբերմունքի փաստագրված 450 դեպքերի մասին:Այս մասին նշված է սեպտեմբերի 1-ին ՄԱԿ-ի մարդու իրավունքների գերագույն հանձնակատարի գրասենյակի կայքում տեղադրված հաղորդագրության մեջ: ՄԱԿ-ի փորձագետները նշում են, որ նրանք տեղեկություններ ունեն կանանց և երեխաների նկատմամբ բռնությունների, այդ թվում՝ սեռական բռնության և ռետինե մահակներով բռնաբարության մասին:
Նշվում է նաև, որ Բելառուսում առնվազն վեց մարդու գտնվելու վայրը և առողջական վիճակը անհայտ է նրանց հարազատների համար:
ՄԱԿ-ը կոչ է անում երկրի իշխանություններին դադարեցնել ձերբակալվածների խոշտանգումները և պատասխանատվության ենթարկել ոստիկանության աշխատակիցներին, որոնք, ըստ ականատեսների, կալանավայրերում նվաստացնում և ծեծում են ցուցարարներին: «Խոշտանգումներից ազատությունը մարդու իրավունքներից մեկն է, որն այնքան կարևոր է, որ ոչ մի դեպքում չի կարող սահմանափակվել կամ կասեցվել»,- շեշտել են ՄԱԿ-ում:
