Տեսանյութ. Հակառակորդի ավտոշարասյան խոցումը Մատաղիս տանող ճանապարհին, Արցախի ՊԲ-ն հերքում է Ադրբեջանի՝ Մատաղիսը գրավելու մասին տեղեկությունը
ԱՀ պաշտպանության բանակը հրապարակել է տեսանյութ, թե ինչպես է Մատաղիս տանող ճանապարհին ՊԲ ստորաբաժանումը հակառակորդի ավտոշարասյունը խոցում։Տեսանյութին կից Պաշտպանության բանակը արել է նաեւ գրառում այն մասին, որ Արցախա-ադրբեջանական հակամարտության գոտու ողջ երկայնքով մարտական գործողությունները շարունակվում են։
«Առավել համառ մարտեր են ընթանում հյուսիսային եւ հարավային ուղղություններում: Հակառակորդն անընդհատ ձեռնարկում է հարձակման փորձեր, որոնք մատնվում են անհաջողության ՊԲ ստորաբաժանումների վճռական գործողությունների արդյունքում:
Ադրբեջանական կողմի պնդումներն այն մասին, թե իբր Մատաղիսը գտնվում է իրենց վերահսկողության ներքո, իրականությանը չի համապատասխանում: Տեսանյությում ցուցադրված հակառակորդի ավտոշարասյան խոցումը տեղի է ունենում Մատաղիս տանող ճանապարհին»,- ասվում է Պաշտպանության բանակի ֆեյսբուքյան էջում։
