Լավրովը՝ Ղարաբաղում գերիների փոխանակման մասին.Հայաստանը գերիների ցուցակը չի ներկայացրել անմիջապես ու ամբողջությամբ. գերիների թիվը 62-ից ավել է
ՌԴ-ի, Հայաստանի եւ Ադրբեջանի զինվորականները ներկայումս անվանական ցուցակներ են հաստատում՝ Ղարաբաղում հակամարտությունից հետո ռազմագերիների փոխանակման համար, մամուլի ասուլիսի ժամանակ հայտարարել է Ռուսաստանի ԱԳ նախարար Սերգեյ Լավրովը: Այս մասին տեղեկացնում է ՌԻԱ Նովոստի-ն:Նրա խոսքով, սկզբում պետք էր, որ եւ Հայաստանը, եւ Ադրբեջանը կազմեն այն մարդկանց ցուցակները, որոնք կորել են եւ որոնց ուզում են գերությունից հանել, եւ այդ հարցում ամենամեծ խնդիրներն ուներ հայկական կողմը: «Ադրբեջանը նման ցուցակներ տվել է, և դրանք աննշան են եղել, և բոլորը, ոչ միանգամից, բայց վերադարձվել են, ովքեր հիշատակվել են ադրբեջանական ցուցակներում։ Որևէ այլ իրավիճակ չի առաջացել անհետ կորածների, գերիների, պահվող անձանց հետ կապված Ադրբեջանի համար», - պարզաբանել է ռուս նախարարը։
Նա հիշեցրել է, որ հայկական կողմից ցուցակները տրամադրվել են ոչ միանգամից եւ ոչ ամբողջությամբ, եւ հետագայում տեղի են ունեցել նրանց փոխանակումները, ովքեր նոյեմբերի 9-ին ավարտված իրադարձությունների մասնակից են եղել: «Բայց հիմա գլխավոր հարցը, որն առաջացել է արդեն դեկտեմբերի սկզբին Հադրութի շրջանում, երբ նոյեմբերի վերջին հայ զինակոչիկների մեծ խումբ էր ուղարկվել այնտեղ։ Եվ նրանք գերի են ընկել արդեն մեկ շաբաթ անց՝ դեկտեմբերի սկզբին, տասը օր անց, 62 մարդ», - նշել է Լավրովը։
Ադրբեջանական կողմը, ըստ ՌԴ ԱԳՆ ղեկավարի, այդ փուլում հայտարարել է, որ քանի որ այդ մարդիկ այդ շրջան են տեղափոխվել հրադադարի հայտարարումից և բոլոր մարտական գործողություններից հետո, ապա նրանց պետք է դիտարկել առանձին կարգով, այլ ոչ թե որպես նոյեմբերի 9-ի համաձայնագրի մեջ մտնող:
«Մենք, այնուամենայնիվ, առաջ ենք տանում այդ հարցի քննարկումը շարունակելու անհրաժեշտությունը, որպեսզի այն փակենք՝ առաջնորդվելով «բոլորը բոլորի դիմաց» սկզբունքով։ Ես խոսել եմ Հայաստանի արտգործնախարարի հետ՝ փորձելով ճշտել վերջնական ցուցակները այն մարդկանց, ովքեր այժմ պակասում են, բայց պարզվեց, որ նրանք 62-ից շատ ավելին են։ Եվ հիմա մեր զինվորականները շփման մեջ են Հայաստանի զինվորականների, Ադրբեջանի զինվորականների հետ։ Այժմ այդ անուններով ցուցակները հաստատում են, որպեսզի հասկանան, թե որտեղ կարող են գտնվել այդ մարդիկ», - ընդգծել է Լավրովը։
Ընդ որում, ՌԴ ԱԳՆ ղեկավարը նշել է, որ եթե Ղարաբաղում չլինեին ռուս խաղաղապահները, ռազմագերիների փոխանակման հարցն ավելի դժվար կլիներ լուծել:
