Մեր ռազմատեխնիկայի մեծ մասը վնասված չի եղել,հավանաբար, տեխնիկան թողել են զորամասերում, որպեսզի այն տեղափոխվի Ադրբեջան
Մեր ռազմատեխնիկայի մեծ մասը վնասված չի եղել: Այս մասին լրագրողների հետ զրույցում ասաց ՀՀԿ ներկայացուցիչ, ԱԺ նախկին պատգամավոր Հովհաննես Սահակյանը:Նա պարզաբանեց, որ դա պարզ է դառնում Բաքվում տեղի ունեցած շքերթի կադրերից:
«Հավանաբար, տեխնիկան թողել են զորամասերում, որպեսզի այն տեղափոխվի Ադրբեջան»,-ենթադրեց ՀՀԿ ներկայացուցիչը:
Նրա խոսքով՝ ՀՀ երրորդ նախագահ Սերժ Սարգսյանը բանակցություններ էր վարում ոչ թե հանձնելու, այլ ստանալու շուրջ, սակայն կան քաղաքական ուժեր եւ գործիչներ, որոնք սպեկուլյացիա են անում դրանով: «Մենք խոսում էինք փոխզիջման մասին: Դա ենթադրում էր Արցախի կարգավիճակի որոշում եւ Լաչինի ու Քարվաճառի ճանապարհների հսկողություն, այլ ոչ թե տարածքների կորուստ, բանակի եւ պետության գլխատում, ինչպես տեղի ունեցավ այսօր: Այդ քաղաքական գործիչների տրամաբանությամբ մենք չպե՞տք է աշխատանքներ կատարեինք Ֆիզուլիում, Ջաբրայիլում եւ այլ վայրերում, որտեղ կանգնած էին մեր զինվորները: Որոշ մարդիկ պարզապես փորձում են օգտվել այդ հարցից, որպեսզի ներառվեն օրակարգում կամ իրենց գոյության մասին հիշեցնենք»,-հավելեց նախկին պատգամավորը:
Նա զարմանք հայտնեց Փաշինյանի այն հայտարարության կապակցությամբ, թե Շուշին դժգույն քաղաք է, նա հիշեցրեց, որ Շուշիում ավելի շատ ներդրումներ են կատարվել, քան Ստեփանակերտում:
«Մարդիկ արդեն անցել են ցինիզմի եւ ստի բոլոր սահմանները, փորձում են ցանկացած գնով երկարացնել իրենց իշխանությունը: Նրանք երկիրը տարել են դեպի դեսպոտիզմ եւ տոտալիտարիզմ: Իշխանությունն այլեւս նրանց չի պատկանում: Նրանք նախ հեծանիվով էին երթեւեկում, իսկ այօսր չեն կարողանում հանգիստ հասնել աշխատանքի, իսկ երկրի շատ մարզեր նրանց մուտքն ընդհանրապես փակ է: Հասկանալով, որ ընտրություններին չեն հավաքի ձայների 5 տոկոսը՝ նրանք որոշել են իրենց ապահովագրելու համար նվազեցնել շեմը մինչեւ 4 տոկոս»,-նշեց Սահակյանը:
Նա նկատեց, որ Մոսկվայում հանդիպման ժամանակ ռազմագերիների վերադարձի եւ Արցախի կարգավիճակի հարցերն առաջ տանելու փոխարեն Փաշինյանը դրանք ձախողեց, ապա պատասխանատվությունը գցեց այլոց վրա:
Փետրվարի 20-ի հանրահավաքը կլինի սկզբունքային եւ բազմամարդ: Մեզ հաճախ հարցնում են, թե ինչու չենք կիրառում մեթոդներ, որոնք կիրառել են մեր դեմ, ինչու փողոցներ չենք փակում: Մենք գնում ենք սահմանադրական ճանապարհով: Մեր նպատակն է սահմանադրական մեթոդներով հասկացնել, որ ներկայիս ուժերի՝ իշխանության մնալու ամեն օրը սպառնալիք է մեր պետության համար: Նման տեմպերով մենք կկորցնենք Սյունիքը՝ հաշվի առնելով այն, որ իշխանությունն ասում է, որ մարզում ճանապարհների որոշ հատվածներ անցնում են «Ադրբեջանի տարածքով», այսինքն՝ դեպի Իրան մեզ համար կարեւոր ուղղությունը վերահսկում է թշնամին: Մարդիկ վախենում են, որ գիշերը իրենց կգլխատեն, վախենում են, որ կարող են գերի ընկնել»,-եզրափակեց ՀՀԿ ներկայացուցիչը:
