Գերեվարվածների վերադարձից հետո աղմկահարույց փաստեր կհրապարակեմ
Նիկոլ Փաշինյանը բազմաթիվ բաներ է խոստացել և հիմա բերում են թուղթը, որտեղ գրված են նրա խոստումները և ասում, որ ստորագրի։ Լրագրողների հետ զրույցի ժամանակ ասաց ԱՀ ԱԻՊԾ նախկին փոխտնօրեն Բորիս Ավագյանը։«Ես ունեմ տեղեկություններ, որ այդ խոստումներն ադրբեջանական կողմին տրվել են։ Մենք տեսնում ենք, և նա էլ խոստովանեց։ Լավ է՝ գոնե Միքայել Մինասյանը եսիմ որտեղից այդ փաստաթղթերը ճարում, հրապարակում է և գոնե այդպես ենք իմանում։ Հրապարակում է, մյուս օրն էլ վարչապետի պաշտոնակատարն ասում է՝ ճիշտ է ասում, իսկապես կա լավ թուղթ։ Ի՞նչն է լավ։ 7 ամիս է՝ խոսք ես տալիս, որ երեխեքը հետ են գալու, ու՞ր են։ Երբ այդ երեխաները վերադառնան, խոստանում եմ՝ այնպիսի բաներ կհրապարակեմ։ Ուղղակի հասկանում եմ, որ կարող է վնասել նրանց վերադարձին, դրա համար չեմ հրապարակում, թե ինչ պատճառով են նրանք այնտեղ գերության մեջ հայտնվել»,-ասաց Բորիս Ավագյանը՝ խոստանալով գերիների վերադարձից հետո խոսել այդ ամենի մասին, որոնց վերաբերյալ քրեական գործեր կլինեն։
Հարցին՝ արդյոք ԱԱԾ-ում տեղյակ են այդ մասին, Բորիս Ավագյանն ասաց, որ այնտեղ ամեն ինչից էլ տեղյակ են։
Բորիս Ավագյանը նկատեց՝ իշխանությունն անընդհատ խոստումներ է տալիս, որ հարցը կլուծեն, սակայն գերեվարվածները չկան. «Միայն տեսնում ենք, որ դիակներ են պահել։ Այդպես պետք է պահեի՞ն մեր երեխաների դիակները։ Արժանի էի՞ն այդ երեխաները։ Պատերազմի ժամանակ, որ կանգնում ու ասում էր՝ հարգելիներս գնացեք կռվեք հայրենիքի համար, հիմա այս երեխաները, որ գնացել ու մահացել են, սրան է՞ին արժանի»,-ասաց Բորիս Ավագյանը՝ հավելելով, որ իրենց հույսը մնացել է ՌԴ-ի աջակցությունը։
Ռուսաստան բանակցությունների են ուղարկել մի անձնավորության, որը երկու շաբաթ սահմանագծման հարցով բանակցություններ է վարում, իսկ արդյունքում տեսնում ենք՝ նոր գերիներ են վերցնում։
Նշենք, որ այս պահին զինծառայողների հարազատները ՌԴ դեսպանատան մոտ են, որտեղ պահանջում են վերադարձնել գերիներին։
Բորիս Ավագյանը լրագրողների հետ զրույցի ժամանակ նշեց, որ Ռուսաստան գերիների հարցով բանակցությունների պետք է ուղարկեին ՊՆ-ից այլ գեներալի և ԱԱԾ տնօրեն Արմեն Աբազյանին։
«Արմեն Աբազյանն ինձ հրավիրել է և ասել, որ եթե կարող է ինչ-որ բանով աջակցել այն գործողություններին, որոնք կնպաստեն երեխաների վերադարձին, ապա կանի դա։ Սա շատ հայրենասիրական քայլ էր և զարմացած էի։ Ադրբեջանական կողմից Ռուսաստան բանակցությունների է գնացել Սուլթանովը, ով Ալիևի աջ ձեռքն է։ Ադրբեջանական կողմն ինչքան լուրջ է պատրաստվում այդ բանակցություններին, իսկ մեր կողմից գնացել են ինչ-որ մարդիկ, որոնք 2 շաբաթում անգամ սահմանագծման հարցում չկարողացան բանակցությունների գալ ։ Կան բազմաթիվ ծնողներ, որոնք ստույգ տեղեկություններ ունեն, թե որտեղ են գտնվում իրենց երեխաները։ Ո՞վ է զբաղվում այդ ամենով»,-նշեց Բորիս Ավագյանը։
Վերջինս, անդրադառնալով Նիկոլ Փաշինյանի այն հայտարարությանը, որ հայկական կողմի համար շահեկան փաստաթուղթ են ստորագրելու, նկատեց՝ շատ լավ թուղթն այն է, որը ստորագրելուց հետո գերեվարվածները կվերադառնան։
