Հրատապ բերել եք այս նախագիծը, ի՞նչ է տալու քաղաքացուն այս ծանր վիճակում ձեր աշխատավարձերի բարձրացումը
Ես զուգադիպությունների չեմ հավատում, չեմ հավատում, որ այս նախագիծն արտահերթ նիստով բերելը զուգադիպություն էր պատգամավորների հավելավճաները մինչև 250.000 դրամ բարձրացման հետ: Խիստ կասկածներ ունեմ որ սա քաղաքական որոշում է: Քաղաքապետարանի աշխատակիցների աշխատավարձը բարձրացնելու վերաբերյալ նախագծի քննարկման ժամանակ ասաց Երևանի ավագանու «Լույս» խմբակցության անդամ Անի Խաչատրյանը:Նա ընդգծեց, որ այս պատերազմական շրջանում դա հրատապ արտահերթ նիստով բերելու նախագիծ չէր.
«Աշխատակիցները երկու տարուց ավել սպասում են աշխատավարձերի բարձրացմանը, այս մեկ ամիսն էլ կսպասեին, որ նախագիծը գար հաջորդ հերթական նիստ: Դուք հրատապ բերել եք այս նախագիծը, որը, մեղմ ասած, բարոյական չէ Հայաստանում տիրող իրավիճակում: Թաղապետի 400.000 դրամանոց աշխատավարձը բարձրանում է 800.000 դրամ: Ո՞ր արժանիքի համար: Վարչական շրջանի աշխատակիցների աշխատավարձը բարձրանում է 100%-ից ավել տոկոս, իսկ սովորական աշխատակիցներինը 30% : Արդյո՞ք վարչական շրջանի ղեկավարն անում է ավել աշխատանք, քան օրինակ քաղաքապետարանի վարչության պետը: Նա ավելի շատ աշխատանք է անում, քան թաղապետը, որը թուղթ է ստորագրում է և վայելում է իր պաշտոնը»,-ասաց Անի Խաչատրյանը և հարց ուղղեց նախագծի հեղինակ, ավագանու իմքայլական անդամ Լևոն Հովհաննիսյանին՝
«Սա քաղաքական որոշում է՞ր, ինչո՞ւ այսքան հրատապ բերվեց նախագիծը, ի՞նչ է տալու քաղաքացուն այս ծանր վիճակում ձեր աշխատավարձերի բարձրացումը»:
Լևոն Հովհաննիսյանն էլ նշեց, որ նախագիծը բերել են արտահերթ նիստով , քանի որ հերթական նիստում լինելու է առնվազն 10 հարց, ուստի, ըստ նրա, աշխատավարձերի բարձրացման նախագիծը պետք է բերվեր արտահերթ նիստով, որպեսզի շատ ժամանակ լինելու քննարկելու համար:
Իսկ թե սա քաղաքական որոշու՞մ էր, նա պատասխանեց.
«Քաղաքական թիմի աշխատացվարձերը չեն բարձրանում, նրանց աշխատավարձերը մնում են նույն մակարդակի:Քաղաքական թիմի աշխատավարձերի և պատգամավորների հավելավճարների բարձրացման միջև զուգահեռներ տանելն անհիմն է»,-ասաց Լևոն Հովհաննիսյանը:
