Մեր հիմնական նպատակն այս ապաշնորհ, ազգադավ իշխանություններին հեռացնելն է. ԱԺ-ն դրան հասնելու համար լրացուցիչ հարթակ է
ԱԺ «Պատիվ ունեմ» խմբակցության ղեկավար Արթուր Վանեցյանը լրագրողների հետ զրույցի ժամանակ մանրամասնեց, թե որ դեպքում իշխանության նախաձեռնություններին կողմ կքվեարկեն։ Արթուր Վանեցյանն ասաց, որ եթե իշխանությունները նախագիծ բերեն, որով կառաջարկվի բարձրացնել արցախյան պատերազմում հաշմանդամ դարձած զինծառայողների վճարումները, միանշանակ կողմ կքվեարկեն։
«Մենք ԱԺ ենք եկել, որ աշխատենք և ԱԺ-ն լինի լրացուցիչ հարթակ մեր հիմնական նպատակին հասնելու համար, իսկ մեր հիմնական նպատակն այս ապաշնորհ, ազգադավ իշխանություններին հեռացնելն է»,-ասաց Արթուր Վանեցյանը։
Վերջինս նշեց, որ այժմ ունենք նոր որակի ընդդիմություն և առաջին աշխատանքային օրը ցույց է տալիս, որ պահանջատեր է լինելու և տեր է կանգնելու ժողովրդի կողմից տրված քվեներին։
«Մեզնից ավելի ռադիկալ կամ ընդդիմադիր թող որևէ մեկը չփորձի թվալ կամ լինել»,-նշեց Արթուր Վանեցյանը։
Անդրադառնալով սահմանին տիրող իրավիճակին՝ Արթուր Վանեցյանն ասաց, որ տիրապետում են միայն մամուլում առկա տեղեկատվությանը. «Գաղտնի հատվածները, որոնք վերջին շրջանում հաճախ են լինում, մեզ հասանելի չեն։ Թե ինչ է կատարվել Մոսկվայում, ինչ են խոսել, ինչի դիմաց են դադարել սահմանի կրակոցները, թե ինչ բանավոր պայմանավորվածությունների արդյունքում ինչ տարածքներ են զիջելու, չգիտենք։ Պետք է լինենք շատ զգոն, ուշադիր ու կարողանանք այդ բոլոր հարցերը պահել մեր ուշադրության կենտրոնում»,-նշեց Արթուր Վանեցյանը։
