«Ինոխոդեց» ԱԹՍ-ն երեք չափանիշով գերազանցում է «Բայրաքթարին»․ Ռուսական ԱԹՍ-ի մշակող
«Ինոխոդեց» հարվածային անօդաչու թռչող սարքը («Օրիոնի» տարատեսակը՝ ՌԴ զինված ուժերի համար) երեք չափանիշով գերազանցում է թուրքական «Բայրաքթարին», «Բանակ-2021» համաժողովի նախաշեմին ՌԻԱ Նովոստիին տված հարցազրույցում հայտնել է «Կրոնշտադտ» ընկերության գլխավոր տնօրեն Սերգեյ Բոգատիկովը։«Եթե «Ինոխոդեցը» համեմատենք «Բայրաքթարի» հետ, ապա հստակ կարող եմ ասել, որ մեր համալիրն ավելի մեծ ներուժ և հնարավորություններ ունի։ Մասնավորապես «Ինոխոդեցը» զգալիորեն ավելի տեխնոլոգիական է արտադրության մեջ, միանշանակ ավելի լավն է աէրոդինամիկայի և արհեստական ինտելեկտի տարրերի մասով»,-ասել է Բոգատիկովը։
Նա ավելացրել է, որ եթե «Բայրաքթարը» Ռուսաստանում մշակվեր, այն բարդ ճակատագիր կունենար, քանի որ թուրքական սարքը չի համապատասխանում ռուսական մի շարք ռազմական պահանջներին։
«Ինոխոդեցը» («Օրիոն») դասվում է միջին բարձրության հարվածային անօդաչու թռչող սարքերի թվին՝ թռիչքի մեծ տևողությամբ։ Սարքը կարող է թռիչքի մեջ գտնվել մինչև 24 ժամ։ Թռիչքային առավելագույն զանգվածը 1150 կգ է, կրեյսերային արագությունը՝ 200կմ/ժ, թռիչքի առավելագույն բարձրությունը՝ 7 կիլոմետր։ Անօդաչուի թևի բացվածքը՝ 16 մետր, երկարությունը՝ 8 մետր։
Ռուս զինվորականները անօդաչու համալիրի թռիչքային փորձարկումների շրջանակում «Ինոխոդեց» են կիրառել Սիրիայում ահաբեկիչներին ավիահարվածներ հասցնելու համար: Սարքերից մեկը Սիրիայում 38 թռիչք է կատարել, որից 17-ը հարվածներ է հասցրել ահաբեկիչների օբյեկտներին։
