Աշխարհը պետք է ճնշում գործադրի Հայաստանի վրա, որ ստիպի Երևանին՝ հրաժարվել ռևանշիզմից.Բայրամով
Միջազգային հանրությունը պետք է ճնշում գործադրի Հայաստանի վրա, որ ստիպի Երևանին՝ հրաժարվել ռևանշիզմից. հայտարարել է Ադրբեջանի արտգործնախարար Ջեյհուն Բայրամովը:«Մեր սկզբունքային դիրքորոշումն այն է, որ միջազգային հանրությունը պետք է ճնշում գործադրի Հայաստանի վրա, որպեսզի նրան ստիպի հրաժարվել ռևանշիստական մոտեցումից (Արցախի հարցում)»,- ասել է Բայրամովը՝ ելույթ ունենալով Ժողովրդավարության և տնտեսական զարգացման կազմակերպության (ՎՈՒԱՄ) անդամ երկրների արտաքին գործերի նախարարների խորհրդի՝ Նյու Յորքում անցկացված նիստում:
Նրա խոսքով, ըստ Ադրբեջանի ԱԳՆ-ի, «եռակողմ հայտարարությունների ամբողջական կիրառմանը, պատերազմի բոլոր հետևանքների վերացմանն ու տարածաշրջանի բոլոր երկրների ու ժողովուրդների համար բարեկեցիկ ապագա կառուցելուն այլընտրանք չկա»:
Բայրամովն ընդգծել է, որ միջազգային իրավունքի կիրառումը խաղաղության, անվտանգության և զարգացման պայման է: «Ցավոք, ՎՈւԱՄ-ի անդամ երկրների տարածքներում երկարատև հակամարտությունները շարունակում են սպառնալիք լինել խաղաղության և անվտանգության համար, և այդ հակամարտությունները պետք է լուծվեն ինքնիշխանության, տարածքային ամբողջականության և միջազգայնորեն ճանաչված սահմանների անձեռնմխելիության սկզբունքների հիման վրա»,- հավելել է ադրբեջանցի արտգործնախարարը:
