Լայնածավալ աշխատանքներ ենք սկսել ` Զանգեզուրի միջանցքի ստեղծման ուղղությամբ,2 տարվա ընթացքում կավարտենք , իսկ ՀՀ տարածքում աշխատանքները կարող են տևել մինչև 1,5 տարի
Երկու տարվա ընթացքում Ադրբեջանը նախատեսում է ավարտել իր տարածքում «Զանգեզուրի միջանցքի» ստեղծման աշխատանքները, իսկ Հայաստանի տարածքում աշխատանքները կարող են տևել մինչև մեկուկես տարի, ասել է Ադրբեջանի նախագահ Իլհամ Ալիևը:«Մենք լայնածավալ աշխատանքներ ենք սկսել Ադրբեջանում` Զանգեզուրի միջանցքի ստեղծման ուղղությամբ: Զանգիլանում կառուցվում է երկաթուղի և մայրուղի, կառուցվում են օդանավակայաններ: Կարծում եմ, որ մեր տարածքում աշխատանքները կավարտենք երկու տարվա ընթացքում, քանի որ այստեղ աշխատանքի ծավալը շատ մեծ է: Հայաստանի տարածքում երկաթգծի և ճանապարհի երկարությունը 40 կիլոմետր է: Դա կարող է տևել 1-1,5 տարի», - ասել է Ալիևը թուրքական «Anadolu» գործակալությանը տված հարցազրույցում:
Նրա խոսքով՝ «Զանգեզուրի միջանցքի» բացումը պայման է Ադրբեջանի և Հայաստանի միջև հարաբերությունների կարգավորման գործընթացը սկսելու համար:
«Իհարկե, սա պահանջ է: Որովհետև դա ասված է նոյեմբերի 10-ի հայտարարության մեջ: Հայաստանը ստանձնել է այս պարտավորությունը: Եթե չի կատարում այս պարտավորությունը, ապա ի՞նչ կարգավորման մասին կարող ենք խոսել», - ասել է Ալիևը:
