Իրանը զգայուն է իր մերձակայքում գտնվող պաշտոնական սահմանների փոփոխությունների նկատմամբ և չի կարող ընդունել դրանք, չենք հանդուրժի որևէ փոփոխություն
Իրանի բանակի ցամաքային ուժերի գլխավոր հրամանատար, բրիգադային գեներալ Քյումարս Հեյդարին հայտարարել է, որ Իրանի Իսլամական Հանրապետությունը չի հանդուրժի որևէ փոփոխություն իրանական տարածքին մոտ գտնվող պաշտոնական սահմաններում: Հեյդարին այս մասին ասել է IRNA գործակալությանը տված հարցազրույցում` ուրբաթ օրը Իրանի Հանրապետության սահմանների երկայնքով մեկնարկած իրանական խոշոր զորավարժությունների ժամանակ, իսկ սոցիալական ցանցերում տեղադրված տեսանյութերն ու լուսանկարները ցույց են տալիս իրանական ուժերի և ռազմական տեխնիկայի զանգվածային տեղակայումը: Այս մասին գրում է Iran International-ը։«Մեր տարածաշրջանում կան անցանկալի տարրեր, որոնք ցանկանում են ապակայունացնել տարածաշրջանը և խաթարել նրա անվտանգությունը։ Մենք ավելի զգայուն էինք մեր սահմաններում տեղի ունեցող իրադարձությունների վերաբերյալ, քանի որ իսրայելական տարրերը հայտնվել են մեր տարածաշրջանում: Մենք հետևում ենք նրանց գործունեությանը»,-ասել է Հեյդարին։
Կայքը գրում է, որ անցյալ տարի, երբ Լեռնային Ղարաբաղի շուրջ պատերազմը տեղի ունեցավ Ադրբեջանի և Հայաստանի միջև, իրանցի պաշտոնյաներն ու զինվորական հրամանատարները հայտարարեցին, որ տարածաշրջանում կան իսրայելական տարրեր, և որ Ադրբեջանն ու Թուրքիան Սիրիայի ջիհադական ջոկատներին տեղակայել են Իրանի սահմանների մոտակայքում:
«Մենք դեռ չենք համոզվել, որ Սիրիայից տարածաշրջան եկած ահաբեկիչները լքել են այս շրջանը։ Իրանը զգայուն է իր մերձակայքում գտնվող պաշտոնական սահմանների փոփոխությունների նկատմամբ և չի կարող ընդունել դրանք»,-ասել է Հեյդարին։
Կայքը գրում է, որ Հայաստանին հստակ նկատի ունենալով՝ Հեյդարին ասել է. «Եթե մի երկրում հնարավոր թուլություն է նկատվում իր սահմանները պաշտպանելու հարցում, դա դեռ պատճառ չէ, որպեսզի այլ երկրներն այդ սահմանները փոխեն: Իսլամական Հանրապետությունը դա թույլ չի տա»։
Գեներալ Հեյդարին ավելացրեlլ է, որ իրանական զորավարժությունները «նպատակ ունեն գնահատել և խթանել իրանական ուժերի մարտունակությունը, քանի որ մեր հարևանությամբ մի քանի այլ զորավարժություններ են ընթանում:
«Վերջին մեկ ամսվա ընթացքում մեր սահմաններից հյուսիս չորս-հինգ զորավարժություն է եղել, և ներկայումս Թուրքիան նաև հերթական զորավարժությունն է իրականացնում մեր հյուսիսային սահմանների մոտ»,- ասել է Հեյդարին։
Հեյդարին, սակայն, պնդել է, որ Իրանը երբեք չի հարձակվել որևէ երկրի վրա վերջին երկու դարերի ընթացքում, և որ Իրանը շեշտել է Ադրբեջանի տարածքային ամբողջականության վրա, քանի դեռ «Ղարաբաղը գտնվում էր հայկական հսկողության տակ»:
Նա պնդել է, որ տարանցիկ ճանապարհորդությունները տարածաշրջանում պետք է մնան անվտանգ և ապահով, իսկ առևտրի և էներգիայի փոխանցման տարանցիկ ուղիները պետք է հարգվեն տարածաշրջանի երկրների կողմից: Նա ակնհայտորեն ակնարկում էր անցած ամիսների ընթացքում Ադրբեջանի կողմից իրանցի բեռնափոխադրումների տարանցիկ ուղևորափոխադրումների խոչընդոտը Ադրբեջանի կողմից Հայաստանի տարածքում։
