ԱՄՆ-ը չինական ընկերություններին զգուշացնում է հետեւանքների մասին՝ Ռուսաստանին օգնելու դեպքում
ԱՄՆ-ը չինական ընկերություններին զգուշացնում է հետեւանքների մասին՝ Ռուսաստանին օգնելու դեպքում, եւ եթե Ռուսաստանը ներխուժի Ուկրաինա, հաղորդում է Reuters-ը։Այս մասին ասել է ԱՄՆ Պետդեպարտամենտի ներկայացուցիչ Նեդ Փրայսն այն բանից հետո, երբ Չինաստանի ԱԳՆ-ն ասել է, որ Պեկինը եւ Մոսկվան երկու երկրների արտգործնախարարների հանդիպման ժամանակ համաձայնեցրել են իրենց դիրքորոշումները Ուկրաինայի հարցում։
«Մենք ունենք մի շարք գործիքներ, որոնք կարող ենք օգտագործել, եթե օտարերկրյա ընկերությունները, այդ թվում՝ Չինաստանից ընկերությունները, ամեն ինչ անեն՝ փոխհատուցելու ԱՄՆ արտահանման վերահսկման գործողությունները, խուսափելու եւ շրջանցելու դրանք»,- ասել է Փրայսը:
Սպիտակ տան ազգային անվտանգության հարցերով ներկայացուցիչ Փիթեր Հարելն ավելի վաղ ասել էր, որ Վաշինգտոնն աշխատում է արտահանման վերահսկողության վրա Ասիայում դաշնակիցների հետ, ներառյալ Ճապոնիան եւ Հարավային Կորեան:
Փրայսն ասել է, որ Ռուսաստանը պետք է իմանա, որ Պեկինի հետ ավելի սերտ հարաբերությունները չեն փոխհատուցում ներխուժմանն ի պատասխան հետեւանքները: «Եթե Ռուսաստանը կարծում է, որ կկարողանա… մեղմել այդ ազդեցություններից մի քանիսը (Չինաստանի հետ ավելի սերտ հարաբերությունների միջոցով), ապա դա այդպես չէ: Սա իրականում կդարձնի Ռուսաստանի տնտեսությունը շատ առումներով ավելի փխրուն»,- ասել է նա:
Փրայսը հայտնել է, որ ԱՄՆ պետքարտուղար Էնթոնի Բլինքենը եւ Չինաստանի արտգործնախարար Վան Ին անցյալ շաբաթ հեռախոսազրույցի ընթացքում ընդլայնված քննարկում են ունեցել Ուկրաինայի դեմ Ռուսաստանի գործողությունների հնարավոր հետեւանքների մասին։
Փրայսի խոսքերը մեկնաբանելու հարցին Վաշինգտոնում Չինաստանի դեսպանատան ներկայացուցիչ Լյու Պենյուն ասել է. «Մենք ի գիտություն ենք ընդունել համապատասխան հաղորդագրությունները: Լարվածության ստեղծումը չի նպաստում ուկրաինական ճգնաժամի թուլացմանը, այլ միայն ավելացնում է անորոշությունը տարածաշրջանում եւ ամբողջ աշխարհում։ Չինաստանը կտրականապես դեմ է դրան»։
