Ադրբեջանը սողացող պատերազմի տեսքով փորձում է ահաբեկել արցախահայությանը.սադրանքները կսկսվեն գարնանը
«Վերջին սահմանային միջադեպերը հստակ ազդակ են այն մասին, որ Ադրբեջանը պատրաստվում է ավելի լուրջ ռազմական սադրանքների, փոքր, նույնիսկ միջինին ձգտող ռազմական բախումների»,- այսօր հայտնեց ադրբեջանագետ Գառնիկ Դավթյանը՝ վերլուծելով Գեղարքունիքի և Սյունիքի սահմանային միջդիրքային հատվածներում արձանագրված միջադեպերը:Ադրբեջանագետի կանխատեսումներով՝ Սյունիքի հատվածում սադրանքները կսկսվեն գարնանը՝ հենց եղանակային պայմանները թույլ տան:
Գառնիկ Դավթյանն ասաց, որ նման եզրակացության է եկել ադրբեջանական մեդիան և պաշտոնական հայտարարությունների ուսումնասիրության արդյունքում:
Նա հայտնեց, որ պաշտոնական Բաքուն մշտապես հայկական կողմին մեղադրում է հրադադարը խախտելու, իրենց զինվորներին վիրավորելու, սպանելու մեջ և հոխորտում է պատասխան տալ, որոնք ինքը համադրել է ադրբեջանական նենգ և հայտնի ստի քաղաքականության հետ և հանգել այն եզրահանգման, որ սադրանքներ է նախապատրաստվում:
Անդրադառնալով Արցախում նախորդ մեկ օրում արձանագրված հրադադարի խախտման երկու միջադեպին՝ ադրբեջանագետը հայտարարեց, որ ադրբեջանցիների նպատակը արցախցիներին հնարավորինս ահաբեկելն է՝ փորձելով խոչընդոտել վար ու ցանքի իրականացումը և դրա միջոցով ստեղծել սոցիալական խնդիր՝ սննդի ապահովման հարց:
Նրա կարծիքով՝ Ադրբեջանը փորձում է արցախցիներին ստիպել, որպեսզի նրանք լքեն Արցախը:
Փաստելով, որ ադրբեջանական քարոզչամեքենան վերջին շրջանում հաճախ խոսում է Արցախից բնակիչների հեռանալու մասին՝ Գառնիկ Դավթյանն ասաց. «Ադրբեջանական կողմը անհիմն ու ճղճիմ քարոզչությամբ փորձում է ասել, որ Արցախում 20-25 հազար բնակչություն է մնացել, երբեմն նաև 10-15 հազարի բնակչի կեղծ թվեր են շրջանառում: Սա վկայություն է այն մասին, որ Ադրբեջանը սողացող պատերազմի տեսքով փորձում է ահաբեկել արցախահայությանը»:
