Հղի կնոջը վրաերթի ենթարկելու համար Փաշինյանին ուղեկցող անձնակազմի ներկայացուցիչը՝ սպայական վաշտի հրամանատարը ձերբակալվել է
ՀՀ քննչական կոմիտեն հայտարարել է, որ հղի կնոջը վրաերթի ենթարկելուց հետո սպայական վաշտի հրամանատարը ձերբակալվել է՝ հաստատելով, որ նա դեպքից հետո հեռացել էր։«ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածի 1-ին մասով հարուցված քրեական գործի շրջանակներում իրականացվում են քննչական և դատավարական այլ գործողություններ՝ Երևան քաղաքի Պարոնյան և Լեո փողոցների խաչմերուկում տեղի ունեցած մահվան ելքով վրաերթի հանգամանքները պարզելու ուղղությամբ:
Նախնական տվյալներով, 2022թ. ապրիլի 26-ին՝ ժամը 18:05-ի սահմաններում, Երևան քաղաքի վերոնշյալ փողոցների խաչմերուկում ՀՀ ոստիկանության «Ճանապարհային ոստիկանություն» ծառայության ուղեկցող սպայական վաշտի հրամանատարն իր կողմից վարած «Տոյոտա Պրադո» մակնիշի ավտոմեքենայով վրաերթի է ենթարկել Արարատի մարզի 28-ամյա բնակչուհուն, որի հետևանքով ստացած մարմնական վնասվածքներով վերջինս տեղափոխվել է «Նաիրի» բժշկական կենտրոն, որտեղ գիտակցության չգալով՝ մահացել է:
Նշված ավտոմեքենայի վարորդը դեպքից հետո թողել է ճանապարհատրանսպորտային պատահարի վայրը և հեռացել»,- հայտնում են քննչական կոմիտեից։ Նույն աղբյուրի փոխանցմամբ՝ վարորդը դեպքի վայր է վերադարձել ժամը 20:05-ին և մասնակցել կատարվող քննչական գործողություններին, երբ դեպքի մասին արդեն հայտնի էր դարձել մամուլին։
Վերջինս ձերբակալվել է:
Ինչպես արդեն հայտնի է՝ Լեո-Պարոնյան-Պռոշյան փողոցների հատվածում Նիկոլ Փաշինյանի կառավարական ավտոշարասյունը վթարի է ենթարկել 19 տարեկան երիտասարդ հղի կնոջ, որը տեղափոխվել էր հիվանդանոց, որտեղ մահացել է։
