Ճանապարհը կբացվի 2 դեպքում.մենք պետք է 2-րդ տարբերակով առաջ շարժվենք, այլապես...
Մեկ խոսքը կարող էր բավարար լինել Լաչինի միջանցքը բացելու համար, իսկ լռությունը բավարար է ճանապարհը փակ պահելու համար։ Այսօր Ազգային ժողովում ճեպազրույցի ժամանակ հայտարարեց «Քաղաքացիական պայմանագիր» խմբակցության պատգամավոր, Եվրոպական ինտեգրման հարցերի մշտական հանձնաժողովի նախագահ Արման Եղոյանը։«Ճանապարհը կբացվի երկու դեպքում` կա՛մ երբ ճանապարհը փակողների պահանջները կատարվեն, կա՛մ երբ փակողները տեսնեն, որ իրենց պահանջները անհնար է իրականացնել։ Կարծում եմ, որ մենք պետք է երկրորդ տարբերակով առաջ շարժվենք, որովհետև առաջին տարբերակով շարժվելու տեղ չունենք»,– նշեց նա։
Լրագրողների հարցրին` հավանակա՞ն է արդյոք, որ ճանապարհը բացվի մինչև տարեվերջ»
«Ես կանխատեսում չեմ ուզում անել, ես քաղաքական կոչերն ու իրավիճակն եմ գնահատում, այդ տեսանկյունից հավանականություն կա, բայց կա նաև չբացվելու հավանականություն»,– պատասխանեց Եղոյանը։
Ըստ պատգամավորի` ճանապարհները փակվում ու բացվում են ոչ թե մարդկանց ֆիզիկական ներկայությամբ, այլ ուժերի քաղաքական հարաբերակցությամբ, և հայկական կողմը պետք է աշխատի հենց այդ ուղղությամբ։
«Շատ կարևոր է, որ հարցը մտավ միջազգային օրակարգ, կարևոր է, որ այնտեղ հնչեցին ձևակերպումներ , որոնք Ադրբեջանը ոչ մի կերպ չէր ցանկանա, որ հնչեին»,– հավելեց նա։
Ամբողջ աշխարհի տեղեկացված լինելը, ըստ Եղոյանի, արդեն գործիք է իրավիճակը լավացնելու համար։
