Աղաղակող դեպք. Եկատերինբուրգում ձերբակալել են հայ համայքի ղեկավարին,ում ղեկավարությամբ հայերը դիմել են համաշխարհային հանրությանը Արցախը փրկելու համար
Եկատերինբուրգի հայ համայնքի ղեկավար Մասիս Նազարյանի նկատմամբ վարչական գործ է հարուցվել հանրահավաք, ցույց կամ երթ կազմակերպելու կամ անցկացնելու սահմանված կարգը խախտելու հատկանիշներով։ Այս մասին գրում է «ՏԱՍՍ» գործակալությունը։Ըստ նույն աղբյուրի, նա հինգ օր գտնվել է անազատության մեջ։ԱԺ նախկին պատգամավոր Արման Աբովյանը Թելեգրամի իր ալիքում գրում է.
«Եկատերինբուրգում աղաղակող դեպք է տեղի ունեցել. Քաղաքի հայ համայնքի ղեկավարին հինգ օր կալանավորել են միայն այն պատճառով, որ Եկատերինբուրգի հայկական եկեղեցու բակում գտնվող հայերը դիմել են համաշխարհային հանրությանը Արցախը փրկելու համար։ Ասել եմ ու ասում եմ՝ հայ հասարակության մեջ ռուսաֆոբական տրամադրությունների հիմնական գեներատորներից են նրանք, ովքեր Ռուսաստանում պատրաստ են մի երկու նավթային ընկերության համար վաճառել իրենց հայրենիքը»։
«ՏԱՍՍ»-ը գրում է, որ գործն ուղարկվել է դատարան։
Նազարյանից բացի, նույն վարչական հոդվածով գործ է հարուցվել նաև Էլեն Կիրակոսյանի նկատմամբ, նրան նաև մեղադրում են չարտոնված հանրահավաք կազմակերպելու մեջ: Նշվում է, որ ակցիայի տեսագրության մեջ, որը տեղադրվել է սոցցանցերում, երևում է, թե ինչպես են Նազարյանն ու Կիրակոսյանը կանգնած «Անի-Արմենիայի» դրոշի և «Արցախ, քեզ հետ ենք» ցուցապաստառի մոտ։
