Կրկին մեղադրանք ՀՀ-ի հասցեին․Լաչինի միջանցքը փակ չէ․ ԵԽԽՎ նիստում պնդել է ադրբեջանցի պատվիրակը
Լաչինի ճանապարհը բաց է, վերջին երկու ամսվա ընթացքում այնտեղով անցել է ավելի քան հազար մեքենա։ Նրանց թվում են ռուս խաղաղապահներ, Կարմիր խաչի միջազգային կոմիտեն և Ղարաբաղի խաղաղ հայ բնակչության ներկայացուցիչներին պատկանող մեքենաներ։Այս մասին Լաչինի միջանցքի շրջափակման հարցով ԵԽԽՎ ձմեռային նստաշրջանում կայացած քննարկման ժամանակ ասել է ադրբեջանական պատվիրակության անդամ Քամալ Ջաֆարովը։ Միաժամանակ, նա մեղադրանքներ է հասցեագրել հայկական կողմին՝ պնդելով, թե Երևանը չի կատարում «Զանգեզուրի միջանցքի» մասով և այլ հարցերով ստանձնած իր պարտավորությունները։
Բացի այդ, ադրբեջանցի պատվիրակն անդրադարձել է Արցախի պետական նախարար Ռուբեն Վարդանյանին և նշել, որ վերջինս Մոսկվայից է տեղափոխվել Ստեփանակերտ՝ դա բնութագրելով իբրև քաղաքական ծրագիր։
Ջաֆարովը նաև հայտարարել է, թե Ռուբեն Վարդանյանը ցանկանում է Փաշինյանի փոխարեն դառնալ վարչապետ։
