Երևանը Բաքվի առաջարկների վերաբերյալ հանդես կգա նոր մեկնաբանություններով, մենք չէինք չեղարկել մոսկովյան հանդիպումը, հետաձգել էինք այն
Մենք հնարավոր չգտանք մասնակցելու դեկտեմբերի 23-ին Մոսկվայում պլանավորված Ադրբեջանի ԱԳ նախարարի հետ հերթական քննարկմանը՝ Լաչինի միջանցքի ապօրինի բլոկադայի հանգամանքներից ելնելով, բայց միևնույն է, չմասնակցելով հանդերձ մենք փոխանցել ենք մեր առաջարկները Բաքվին, ԱԳՆ-ում հրավիրված մամուլի ասուլիսին հայտարարեց ՀՀ արտաքին գործերի նախարար Արարատ Միրզոյանը։«Բայց մոտ 10 օր առաջ ստացել ենք Ադրբեջանի պատասխանը։ Ըստ էության՝ քննարկման փուլում ենք։ Սա ցույց է տալիս, որ բանակցքային գործընթացը մեծ հաշվով կանգ չի առել, մեկնաբանություններն ու առաջարկները շարունակվել են փոխանակվել, և այժմ մենք հանդես կգանք մեր նոր մեկնաբանություններով՝ ադրբեջանական կողմի մեկնաբանությունների հիման վրա», - ասաց Միրզոյանը։
«Մենք չէինք չեղարկել մոսկովյան հանդիպումը, հետաձգել էինք այն։ Եվ որոշակի հարմար պահի կգործարկենք հետաձգված հանդիպումը։
Դա կարող է տեղի ունենալ Մոսկվայում կամ այլ քաղաքում։ Վայրի ընտրությունն, իհարկե, կարևոր է, բայց գործընթացի վրա չափազանց էական ազդեցություն չունի», - ասաց Արարատ Միրզոյանը։
