Եթե Բաքու-Երևան-Թբիլիսի եռակողմ երկխոսությունը սկսելու նախաձեռնության հետևում Վաշինգտոնը և Բրյուսելն են, սա բոլորովին այլ պատմություն է. ՌԴ ԱԳՆ
Ռուսաստանի, Ադրբեջանի և Հայաստանի ղեկավարների հայտարարությունները հիմք են հանդիսանում Բաքվի և Երևանի միջև հարաբերությունների կարգավորման համար, ամենշաբաթյա ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով NEWS.ru-ի հարցին։ Նա ընդգծել է, որ չպետք է լինեն այլ ձևաչափեր, որոնք կարող են խաթարել եռակողմ պայմանավորվածությունները։ Նա այսպես է մեկնաբանել Հայաստանի ղեկավարության շահագրգռվածությունը Բաքու-Երևան-Թբիլիսի համագործակցության նոր ձևաչափ սկսելու հարցում։
«Եթե Բաքու-Երևան-Թբիլիսի եռակողմ երկխոսությունը նպաստում է Անդրկովկասում հակասությունների կարգավորմանը, կայունության և անվտանգության ամրապնդմանը, ապա մեզ մնում է միայն ողջունել դա։ Սակայն, եթե այս նախաձեռնության հետևում տեսանելի են Վաշինգտոնի և Բրյուսելի ուրվագծերը, որոնք ձգտում են խաթարել Ռուսաստանի, Հայաստանի և Ադրբեջանի ղեկավարների միջև եռակողմ պայմանավորվածությունները, ապա սա բոլորովին այլ պատմություն է։ Հենց այդ համաձայնագրերն են հիմք հանդիսանում Բաքվի և Երևանի միջև հարաբերությունների կարգավորման համար»,- ասել է Զախարովան։
Նա ընդգծել է, որ յուրաքանչյուր պետություն իրավունք ունի մասնակցելու այն միջազգային ձևաչափերին, որոնք համապատասխանում են իր շահերին, ուղղված չեն երրորդ երկրների դեմ և հաշվի են առնում ուժերի առկա հավասարակշռությունը։ Բայց միևնույն ժամանակ նա հիշեցրել է, որ Անդրկովկասում արդեն կա «3+3» խորհրդատվական տարածաշրջանային հարթակ, որը ներառում է երեք անդրկովկասյան պետությունները, ինչպես նաև Ռուսաստանը, Թուրքիան և Իրանը։
Ավելի վաղ Հայաստանի արտգործնախարար Արարատ Միրզոյանը հայտարարել էր Ռուսաստանի և Ադրբեջանի գործընկերներ Սերգեյ Լավրովի և Ջեյհուն Բայրամովի հետ հանդիպում կազմակերպելու պատրաստակամության մասին։ Նրա խոսքով, Երևանը ոչ թե չեղարկել է անցյալ տարվա դեկտեմբերին կայանալիք ԱԳ նախարարների մոսկովյան հանդիպումը, այլ հետաձգել է այն։ Բանակցությունները հետաձգվել են Լաչինի միջանցքի շրջափակման պատճառով։
