Իրանը ռադարային նախազգուշացում չի ստացել, ինչը նշանակում է, որ սխալ չի եղել, եթե Բաքուն բարի կամք դրսևորեր , ապա հարցը կարող էր լուծվել մեր երկրի դեսպանատան հետ
Իրանի արտգործնախարարության խոսնակ Նասեր Քանանին մամուլի ասուլիսի ժամանակ մեկնաբանել է Ադրբեջանում Իրանի դեսպանի հրավերը երկրի ԱԳՆ։Նա նշել է, որ դեսպանի հրավերը ԱԳՆ-ին կապված է եղել Իրանի տարածքում ինքնաթիռի թռիչքի հետ։
«Դա կանոնավոր չվերթ էր, որն իրականացվում է Իրանի սահմանամերձ շրջաններում և Իրանի տարածքում մոնիտորինգի շրջանակներում։ Նման թռիչքներ նախկինում արդեն իրականացվել են։ Թռիչքն իրականացվել է Իրանի օդային տարածքում Ադրբեջանի սահմանից բավական հեռավորության վրա և սովորաբար այն իրավիճակներում, երբ տեղի է ունենում տեխնիկական սխալ, ռադարներն ու պաշտպանական ցանցերը տալիս են անհրաժեշտ նախազգուշացումները։ Այս թռիչքի հետ կապված՝ Իրանը ռադարային նախազգուշացում չի ստացել, ինչը նշանակում է, որ սխալ չի եղել»,- ընդգծել է Քանանին։
Նա հավելել է, որ Իրանը պաշտպանության ոլորտում հարաբերություններ ունի Ադրբեջանի հետ, գործում է դեսպանատունը, կա ՊՆ կցորդ, եթե Բաքուն բարի կամք դրսևորեր այս հարցում, ապա «հարցը կարող էր լուծվել մեր երկրի դեսպանատան հետ»։
«Այդ իսկ պատճառով մենք չենք կարող մեկնաբանել Ադրբեջանի գործողությունները, որը դեսպանին հրավիրել էր ԱԳՆ և հրապարակել այս թեման, որպես բարի կամքի դրսևորում և բնորոշ երկու հարևան երկրների միջև բնականոն հարաբերություններին։ Մենք Ադրբեջանի հետ հարևաններ ենք և միմյանց պատմական թեւերն ենք, ակնկալում ենք ազնիվ համագործակցություն և նման մասնագիտացված թեմաների քննարկում և լուծում մասնագիտացված շրջանակներում։ Մենք բազմիցս ընդգծել և կրկին շեշտել ենք, որ վիճահարույց թեմաների քննարկումը ԶԼՄ-ներում չի նպաստի խնդրի լուծմանը և բարի կամքի դրսևորում չէ»,- ասել է Քանանին։
