Հայաստանը փորձում է մոլորեցնել միջազգային հանրությանը.նրանք դասեր չեն քաղել պատմությունից և չեն լսել մեր արտաքին գործերի նախարարության մարտի 19-ի պատասխան հայտարարությունը
Ադրբեջանի արտաքին գործերի նախարարության մամուլի խոսնակ Այխան Հաջըզադեն դատապարտել և մերժել է Հայաստանի արտաքին գործերի նախարար Արարատ Միրզոյանի վերջին հայտարարությունները, որոնք նա հնչեցրել էր նախօրեին՝ Ռուսաստանի Դաշնության արտաքին գործերի նախարար Սերգեյ Լավրովի հետ հանդիպման և մամուլի ասուլիսի ժամանակ: Ինչպես փոխանցում է Ադրբեջանի ԱԳՆ մամուլի ծառայությունը, Հաջըզադեն Միրզոյանի հայտարարությունները որակել է «սուտ և զրպարտիչ»։ Հաջըզադեն հերթական անգամ Հայաստանին մեղադրել է 2020 թվականի նոյեմբերի 9-10-ի եռակողմ հայտարարության դրույթները խախտելու՝ մասնավորապես «Ադրբեջանի ինքնիշխան տարածքից իր զորքերը դուրս չդերելու, նոր զինծառայողներ տեղափոխելու, ռազմական սադրանքներ իրականացնելու, ինչպես նաև Լաչինի ճանապարհը Ադրբեջանի բնական ռեսուրսներն արտահանելու և երկրի տարածքներն ականապատելու նպատակով օգտագործելու համար»։
Ադրբեջանցի պաշտոնյան նշել է, թե, իբր «Հայաստանը, որը ադրբեջանցիների նկատմամբ զանգվածային էթնիկ զտումների քաղաքականություն և ցեղասպանություն է իրականացրել»։ Նրա խոսքով՝ երբ Հայաստան Ադրբեջանին մեղադրում է Լաչինի ճանապարհը փակելու, էթնիկ զտումներ և ցեղասպանություն իրականացնելու մեջ, դա ոչ այլ ինչ է քան «հերթական սուտ, որը նպատակ ունի մոլորեցնել միջազգային հանրությանը»։
«Անընդունելի է, որ չնայած Ադրբեջանը հավատարիմ է տարածաշրջանում խաղաղության օրակարգը առաջ մղելու ջանքերին՝ Հայաստանն, այս գործընթացը ձախողելու նպատակով խաբում է միջազգային հանրությանը` փորձելով ստվեր գցել Ադրբեջանի քաղաքացիական հասարակության ներկայացուցիչների Լաչինի ճանապարհին անցկացրած օրինական բողոքի ակցիայի վրա, խուսափում է իր պարտավորություններից, այդ թվում՝ ինչպես տեսանք մարտի 20-ին, Հայաստանի տարածքում ԵՄ առաքելության գտնվելու ընթացքում պարբերաբար սադրանքների է դիմում»,- ասել է նա։
Այխան Հաջըզադեն հավելել է, որ Հայաստանի արտաքին գործերի նախարար Արարատ Միրզոյանի հայտարարություններում առկա են Ադրբեջանի նկատմամբ տարածքային պահանջներ։ Նրա համոզմամբ՝ այդ ամենը ցույց է տալիս, որ Հայաստանը դասեր չի քաղել պատմությունից և չի լսել Ադրբեջանի արտաքին գործերի նախարարության մարտի 19-ի պատասխան հայտարարությունը»։
