Արցախի աշխարհազորի հրամանատար ներկայացող Մաթևոսյանը միանգամից հետ է կանգնել իր մի շարք հայտարարություններից. «Փաստ»
«Փաստ» օրաթերթը գրում է․«Օրերս Արցախի աշխարհազորի հրամանատար ներկայացող Կարեն Մաթևոսյանը հանդես էր եկել տեսաուղերձով և բավական կոշտ ու քննադատական շեշտադրումներով մի քանի հայտարարություններ հնչեցրել՝ թիրախավորելով Արցախի նախկին նախագահներին, Արցախում գործող քաղաքական ուժերին, բարձրաստիճան զինվորականներին։ Մաթևոսյանը բոլորին հորդորել էր միավորվել Արցախի նախագահ Արայիկ Հարությունյանի շուրջ և ստեղծել համազգային կոնսենսուս. այլ կերպ ասած՝ Մաթևոսյանն անուղղակի կերպով իրականացրել էր Հարությունյանի «թաքուն» ցանկությունները։
Ինչպես հայտնում է «Փաստ» թերթի արցախյան աղբյուրը, այդ հայտարարությունուղերձից մի քանի օր անց հայտարարության որոշ «հասցեատերեր» Մաթևոսյանի հետ կապ են հաստատել, ապա հանդիպել և բավական կոշտ խոսակցություն ունեցել։ Թերթի տեղեկություններով, Մաթևոսյանը միանգամից հետ է կանգնել իր մի շարք հայտարարություններից, նշել, որ իր նպատակը ժողովրդին համախմբվածության կոչ հղելն է եղել, իսկ մնացածը տեքստ է եղել, որն ինքը կարդացել է, առանց մանրամասնելու, թե ո՞վ է տեքստի հեղինակը։
Արցախից թերթին հայտնում են, որ Մաթևոսյանի տեքստի հեղինակը Սամվել Բաբայանն է եղել, որի նպատակը ոչ թե Արցախում համախմբում իրականացնելն է, այլ իր քաղաքական և անձնական խնդիրների լուծումն ու քաղաքական հակառակորդներից վրեժ լուծելը։ Ի դեպ, թերթի տեղեկություններով, նշված տեքստի մանրամասների մասին տեղյակ է եղել նաև Արայիկ Հարությունյանը, ուղղորդողը ինքը չի եղել»։
Մանրամասները՝ «Փաստ» օրաթերթի այսօրվա համարում։
