Միլիարդավոր դոլարների գործարքներ ունենք, ԵՄ-ն չի պատրաստվում պատժամիջոցներ կիրառել Ալիևի դեմ. Բորել
Եվրոպական դիվանագիտության ղեկավար Ժոզեպ Բորելը մեկնաբանել է Բաքվի դեմ պատժամիջոցների կիրառման հնարավորությունը։Ըստ նրա՝ էներգետիկայի ոլորտում ավելի քան մեկ տարի առաջ կնքված փոխըմբռնման հուշագրի կասեցման մասին խոսք չկա։ Բացի այդ, Բրյուսելը չի դիտարկում Ադրբեջանի դեմ պատժամիջոցների կիրառման հնարավորությունը, հայտարարել է ԵՄ արտաքին քաղաքականության հարցերով գերագույն հանձնակատար Ժոզեպ Բորելը։
Դիվանագետն ընդգծել է, որ էներգետիկ հարցերի շուրջ փոխըմբռնման հուշագիրը, որը ստորագրվել էր Բրյուսելի և Բաքվի կողմից անցած ամառ, չի նախատեսվում կասեցնել, քանի որ այս փաստաթուղթը հանդիսանում է այն միջոցառումների անբաժանելի մասը, որոնք ԵՄ-ն ձեռնարկում է էներգիայի մատակարարումների դիվերսիֆիկացման համար։
Եվրոպական դիվանագիտության ղեկավարը հավելել է, որ ԵՄ-ն շարունակում է աջակցել Երևանին և Բաքվին հարաբերությունների հետպատերազմյան կարգավորման հարցում, ինչի համար «պահպանում է կապերը ամենաբարձր մակարդակով»։
Հիշեցնենք, որ անցյալ տարվա հոկտեմբերին դիվանագետն արդեն հերքել էր գազային պայմանագրի չեղարկման կամ կասեցման հնարավորության մասին լուրերը:
«Ադրբեջանը մեզ իսկապես տալիս է, ավելի ճիշտ՝ վաճառում է վառելանյութ՝ միլիարդավոր խմ գազ, և այս տարի ստորագրված համաձայնագրի շնորհիվ մենք կունենանք ծավալների զգալի աճ՝ 8-12 միլիարդ խորանարդ մետր»,-ասել է նա։
