Հարցը կքննարկվի Բաքվի հետ.Պեսկովը՝ Արցախում խաղաղապահների առաքելությունը երկարացնելու հնարավորության մասին
Արցախում Ռուսաստանի խաղաղապահ առաքելության շարունակությումը դեռևս պարզ չէ։ Ինչպես URA.RU-ի հարցին ի պատասխան ասել է ՌԴ նախագահի մամուլի քարտուղար Դմիտրի Պեսկովը, այս թեման քննարկման առարկա է լինելու Ադրբեջանի հետ։«Առայժմ դժվար թե որևէ մեկը պատասխանի այս հարցին, քանի որ մենք այժմ խոսում ենք առաքելության մասին, որը գտնվում է Ադրբեջանի տարածքում։ Դա կլինի ադրբեջանական կողմի հետ մեր քննարկման առարկան»,- ասել է Պեսկովը։
Նա նաև հավելել է, որ Հայաստանի և Ադրբեջանի միջև խաղաղության պայմանագրի հարցը մնում է արդիական:
Տրանսպորտային հաղորդակցության զարգացումը կարևոր է Ռուսաստանի Դաշնության, Հայաստանի և Ադրբեջանի համար, Մոսկվան հույս ունի շարունակել այդ աշխատանքը, ասել է Պեսկովը:
Հիշեցնենք, որ Արցախի նախագահ Սամվել Շահրամանյանը հրամանագիր է ստորագրել Արցախի Հանրապետության լուծարման մասին: Ըստ հրամանագրի՝ մինչև 2024 թվականի հունվարի 1-ը լուծարվելու են բոլոր պետական հիմնարկները և կազմակերպությունները, Լեռնային Ղարաբաղի Հանրապետությունը (Արցախ) դադարում է գոյություն ունենալ։
Մինչդեռ Արցախի բնակչությունը, ներառյալ հանրապետությունից դուրս գտնվողները, սույն հրամանագրի ուժի մեջ մտնելուց հետո պետք է ծանոթանան Ադրբեջանի կողմից ներկայացված վերաինտեգրման պայմաններին` ապագայում Արցախում մնալու (վերադառնալու) հնարավորության մասին անկախ և անհատական որոշում կայացնելու նպատակով: Սույն հրամանագիրն ուժի մեջ է մտել հրապարակման պահից անմիջապես հետո։
