Ռուս հրամանատարները գնդակահարում են զինվորներին, ովքեր հրաժարվում են կատարել հրամանները, ինչպես նաև սպառնում են գնդակահարել ամբողջ ստորաբաժանումներին
Ռուս հրամանատարները գնդակահարում են զինվորներին, ովքեր հրաժարվում են կատարել հրամանները, ինչպես նաև սպառնում են գնդակահարել ամբողջ ստորաբաժանումներին, եթե նրանք փորձեն նահանջել, ճեպազրույցի ժամանակ ասել է Սպիտակ տան Ազգային անվտանգության խորհրդի համակարգող Ջոն Քիրբին, հայտնում է «Ամերիկայի ձայն»-ը։Քիրբին ասել է, որ Ռուսաստանը «շարունակում է անտարբերություն դրսևորել իր զինվորների կյանքի նկատմամբ», իսկ ԱՄՆ-ը կարծում է, որ վերջին ռազմական զոհերի թիվը հասնում է հազարների, «որոնցից ոմանք իրենց իսկ ղեկավարների հրահանգով»:
Սպիտակ տան խոսնակը նաև նշել է, որ Ռուսաստանի մոբիլիզացված ուժերը մնում են թերպատրաստված, վատ զինված և մարտական գործողությունների համար անպատրաստ, «ինչպես անցյալ տարվա ձմեռային անհաջող հարձակման ժամանակ»: «Ռուսական զինուժը, կարծես, օգտագործում է այն, ինչ նրանք անվանում են «մարդկային ալիք» մարտավարություն՝ պարզապես մարտի մեջ նետելով այս վատ պատրաստված զինվորների զանգվածները: Առանց համապատասխան սարքավորումների, առանց ղեկավարության, առանց ռեսուրսների, առանց աջակցության»,- ասել է Քիրբին:
Սպիտակ տան բարձրաստիճան պաշտոնյան ասել է, որ ռուսական նոր հարձակումը մի քանի ուղղություններով, ներառյալ Ավդեևկա, Լիման և Կուպյանսկ շրջաններում, «անսպասելի չէր»: «Մենք նախազգուշացրել ենք, որ նախագահ Պուտինը շարունակում է ձգտել նվաճել Ուկրաինան, և մենք աշխատում ենք, որպեսզի Ուկրաինան ունենա իր տարածքը պաշտպանելու համար անհրաժեշտ միջոցները», - ասել է Քիրբին։
Ըստ Քիրբիի՝ հոկտեմբերի 11-ին այդ հարձակման ժամանակ Ռուսաստանը զգալի կորուստներ է կրել, այդ թվում՝ Ավդիևկայի շրջանում առնվազն 125 զրահամեքենա և ավելի քան մեկ գումարտակ։ Միաժամանակ նա նշել է, որ ԱՄՆ-ն ակնկալում է ռուսական նոր հարձակումներ։ «Սա դինամիկ հակամարտություն է, և մենք պետք է հիշենք, որ Ռուսաստանը դեռ պահպանում է որոշ հարձակողական կարողություններ և կարող է առաջիկա ամիսներին հասնել մարտավարական որոշակի ձեռքբերումների», - խոստովանել է Սպիտակ տան պաշտոնյան:
