ՀՀ ԱԺ-ն երաշխավորել է ադրբեջանական պատվիրակության անվտանգությունը, բայց նրանք չեն եկել. Սարգիս Խանդանյան
Ադրբեջանին աձագանքել ենք՝ ասելով, որ ՀՀ ԱԺ-ն պատրաստ է եղել ապահովել Բաքվի պատվիրակության պատգամավորների անվտանգությունը, բայց նրանք չեն եկել: Այս մասին լրագրողների հետ ճեպազրույցում հայտնեց ԱԺ Արտաքին հարաբերությունների մշտական հանձնաժողովի նախագահ Սարգիս Խանդանյանը:Նա նշեց, որ ադրբեջանական պատվիրակությունը մի քանի անգամ բարձրացրել է հարցը, իսկ հայկական կողմը երաշխիքներ է տվել։
Պատգամավորի խոսքով՝ այն պատվիրակությունները, որոնք չեն մասնակցել՝ Թուրքիան, Ադրբեջանը, և Ռուսաստանը, պարզաբանումներ չեն ներկայացրել:
«Բացակայության պատճառներ, որպես այդպիսին, չեն ներկայացվել։ Տեղյակ եմ, որ երեկ Ռուսաստանը դիմել է վեհաժողովի նախագահին նամակով՝ տեղեկացնելով այն մասին, որ իրենց պատվիրակությունը ներկա չի լինելու այս նստաշրջանին։ Հրավերներ ուղարկում է ոչ թե ՀՀ ԱԺ-ն, այլ միջազգային քարտուղարությունը»,- հավելեց նա։
ՔՊ պատգամավորը նաև ասաց, որ «ՌԴ-ն թող գար ԵԱՀԿ նիստին ու իր դիրքորոշումն արտահայտեր տարածաշրջանի իրավիճակի մասին»:
Խանդանյանի փոխանցմամբ՝ աշնանային նստաշրջանում փաստաթղթեր չեն ընդունվում, այն ավելի շատ քննարկումների հարթակ է, այս օրերին 4 թեմատիկ քննարկում է տեղի ունենալու:
Հիշեցնենք, որ Կարեն Դեմիրճյանի անվան մարզահամերգային համալիրում ընթանում է Եվրոպայի անվտանգության եւ համագործակցության կազմակերպության խորհրդարանական վեհաժողովի աշնանային նստաշրջանը՝ «ԵԱՀԿ-ն ճգնաժամի պահերին. Խորհրդարանական վեհաժողովի դերը ներքին եւ արտաքին մարտահրավերները հակազդելու գործում» խորագրի ներքո:
Նստաշրջանին ելույթով հանդես է գալու ԵԱՀԿ խորհրդարանական վեհաժողովի նախագահ Պիա Կաուման, ՀՀ վարչապետ Նիկոլ Փաշինյանը, Աժ նախագահ Ալեն Սիմոնյանը:
Իսկ Ադրբեջանի, Թուրքիայի և ՌԴ-ի պատվիրակությունները չեն մասնակցում ԵԽԽԽՎ աշնանային նստաշրջանին:
