Ֆրանսիան պատրաստվում է ՀՀ-Ին հարձակողական զենք՝ CAESAR համակարգեր մատակարարել. Արդեն 24 Bastion ֆրանսիական զրահամեքենա ՀՀ-ում է
Ֆրանսիայի Սենատը երկրի իշխանություններին խորհուրդ է տվել դիտարկել Հայաստանին հարձակողական զենք մատակարարելու հարցը` նշում են ադրբեջանական լրատվամիջոցները:Խոսքը CAESAR ինքնագնաց հրետանային համակարգերի մասին է՝ ասվում է Սենատի արտաքին հարաբերությունների, պաշտպանության և զինված ծառայությունների հանձնաժողովի կողմից պատրաստված 2024 թվականի պաշտպանական ծախսերի օրինագծում։
Նրանք խորհուրդ են տվել հնարավորինս արագ ուսումնասիրել CAESAR հրետանային համակարգերի մատակարարման հարցը՝ հաշվի առնելով դրանց արդյունավետությունը, ինչպես նաև 2024 թվականին Nexter արտադրող ընկերության նոր արտադրական հզորությունները։
***
Հայաստան է ուղարկվել ֆրանսիական Arquus ընկերության կողմից արտադրված Bastion տիպի 24 զրահամեքենա։ Դրանց պետք է ավելացնել ևս 26 նույն տիպի մեքենաներ, որոնք ներկայումս արտադրության մեջ են՝ հայտնում են օտարերկրյա լրատվամիջոցները:
Ըստ նույն աղբյուրի՝ վերջերս Հայաստանը ֆրանսիական Thales-ից երեք GM2 200 ռադար ձեռք բերելու պայմանագիր է ստորագրել, այժմ էլ բանակցություններ են ընթանում MISTRAL 3 զենիթահրթիռային համակարգերի մատակարարման շուրջ։
2023 թվականի հոկտեմբերի 23-ին Ֆրանսիայի պաշտպանության նախարար Սեբաստիեն Լեկորնուն ասել է, որ Ֆրանսիան օգնում է Հայաստանին բարելավել իր հակաօդային պաշտպանության հնարավորությունները՝ երեք GM 200 ռադարների վաճառքի և «Միստրալ» զենիթահրթիռային հրթիռների ապագա մատակարարումների համաձայնագրի միջոցով։
Նա նաև նշել է, որ Ֆրանսիան կօգնի Հայաստանին նախապատրաստել իր ցամաքային պաշտպանության ուժերը և կաջակցի երկրի զինված ուժերը բարեփոխելու և արդիականացնելու ջանքերին։
