Ադրբեջանը հող է նախապատրաստում ադրբեջանցիների՝ Հայաստան վերադարձի հարցը օրակարգ բերելու համար
Ադրբեջանը հող է նախապատրաստում ադրբեջանցիների՝ Հայաստան վերադարձի հարցը օրակարգ բերելու համար։Այսպես՝ «Արևմտյան Ադրբեջանի համայնք» կոչված կազմակերպությունը հայտարարություն է տարածել՝ հայտնելով, որ Իսլամական համագործակցության կազմակերպության օրերս կայացած գագաթնաժողովում անդամ 57 երկրներ մտահոգություն են հայտնել «Հայաստանից բռնի տեղահանված ադրբեջանցիների ճակատագրի վերաբերյալ, ինչպես նաև աջակցություն հայտնել նրանց խաղաղ, ապահով և արժանապատիվ վերադարձն ապահովելուն իրենց հայրենի հող»:
Ինչպես նշել է «Արևմտյան Ադրբեջանի համայնքը», այս որոշմամբ «ԻՀԿ-ն դարձել է առաջին միջազգային կազմակերպությունը, որը աջակցություն է հայտնել Հայաստանից վտարված ադրբեջանցիների վերադարձին»։
Ադրբեջանական կազմակերպությունը վստահություն է հայտնել, որ «ԻՀԿ-ի աջակցությունը կնպաստի Հայաստանից վտարված ադրբեջանցիների խաղաղ վերադարձին իրենց տները»:
Հավելենք, որ «Արևմտյան Ադրբեջան» կոչվածը հերթական հորինված եզրույթն է, որն առաջ է բերել Բաքուն՝ Հայաստանի ինքնիշխան տարածքները ներկայացնելու որպես «Ադրբեջանի պատմական հողեր» և արդարացնելու իր նկրտումները ՀՀ տարբեր բնակավայրերի ուղղությամբ։
