Ճարտարապետության և շինարարության համալսարանն ու Քաղաքաշինության կոմիտեն աշխատաժողով են անցկացրել
Կարևորելով համալսարանի գիտական ներուժի կիրառական նշանակությունը տնտեսության` հատկապես ինժեներական ոլորտներում՝ Ճարտարապետության և շինարարության Հայաստանի ազգային համալսարանը, ըստ ոլորտների, շահագրգիռ կողմերի հետ սկսում է իրականացնել աշխատաժողովների շարք։Ինչպես հայտնում է ՃՇՀԱՀ֊ի մամուլի քարտուղար Ժասմեն Վիլյանը, 2024 թ.-ի մայիսի 31-ից հունիսի 1-ը Աղվերանում կայացել է ՃՇՀԱՀ- ի ՀՀ քաղաքաշինության կոմիտեի և Կառուցապատողների հայկական ասոցիացիայի հետ համատեղ կազմակերպած «ՀՀ անշարժ գույքի ոլորտի մարտահրավերները և զարգացման ուղիները» խորագրով աշխատաժողովը։ Հաշվի առնելով անշարժ գույքի ոլորտում առկա հիմնախնդիրների կարևորությունը, ինչպես նաև ոլորտի մասնակիցների համագործակցության պահանջը, աշխատաժողովի նպատակն էր վերհանել ոլորտի մարտահրավերները, հիմնախնդիրները, մատնանշել զարգացման ուղիները և ստեղծել ոլորտի մասնակիցների համագործակցության բարելավման մեխանիզմներ։
Անշարժ գույքի ոլորտում առկա խնդիրների լուծմանը նպաստելու առումով, Քաղաքաշինության կոմիտեի նախագահի տեղակալ Նունե Պետրոսյանն իր խոսքում կարևորել է քաղաքաշինական գործընթացների կանոնակարգումը՝ հաշվի առնելով կառուցապատման մեծ ծավալները և առկա բնակարանային ֆոնդի արդիականացման անհրաժեշտությունը.
«Քաղաքաշինության կոմիտեն բաց է քաղաքաշինական ընթացակարգերը հստակեցնելու հնարավորությունները բազմակողմանիորեն քննարկելու համար։ Կոմիտեն մշակում է քաղաքաշինական ծրագրային փաստաթղթեր` կանոնակարգելու ձևավորվող քաղաքաշինական միջավայրերը, միաժամանակ օրենսդրական բարեփոխումների միջոցով ձգտում դյուրացնել գործընթացները։ Առաջիկա տարիներին ջանքերն ուղղելու ենք տարաբնակեցման նախագծի մշակմանը, որի շրջանակում կատարվելու են երկրի ողջ տարածքի համաչափ զարգացման նախանշումներ»:
Աշխատաժողովում հնչեցված մեկ տասնյակից ավելի ելույթները, հետաքրքիր քննարկումների և առաջարկների հիմք են հանդիսացել։
«Այս աշխատաժողովի ամենակարևոր կողմերից մեկը գործընկերների միջև արդյունավետ համագործակցության հաստատումն է և շուկայական խնդիրների լուծումը: Հատկապես կարևոր է այս ոլորտի համար մասնագետներ պատրաստելու մեր հանձնառությունը։ Կարծում եմ՝ ձեզանից շատերը տեղյակ են, որ ներկայումս մեր բուհերում բացակայում են կրթական ծրագրերը, որոնք հարմարեցված են հատուկ անշարժ գույքի շուկայի մասնագետների պատրաստմանը: Մեր հավաքական պարտականությունն է լուծել այս բացը և ճանապարհ հարթել հմուտ մասնագետների հաջորդ սերնդի պատրաստման համար, ովքեր կխթանեն նորարարությունը, կայունությունը և առաջընթացը անշարժ գույքի ոլորտում: Մեր նպատակն է միասին դիտարկել անշարժ գույքի շուկայի բարդությունները, բացահայտել հիմնական մարտահրավերները և համատեղ ստեղծել նորարարական՝ գիտականորեն հիմնավորված լուծումներ, որոնք կնպաստեն ինչպես ոլորտի, այնպես էլ Հայաստանի տնտեսության ընդհանուր զարգացմանը»,- ողջույնի իր խոսքում ընդգծել է ՃՇՀԱՀ-ի ռեկտորի ժամանակավոր պաշտոնակատար Մանուկ Բարսեղյանը։
Հայաստանում առաջին անգամ վերը նշված ձևաչափով իրականացված «ՀՀ անշարժ գույքի ոլորտի մարտահրավերները և զարգացման ուղիները» խորագրով աշխատաժողովում պետական հատվածը ներկայացնում էին էկոնոմիկայի, տարածքային կառավարման և ենթակառուցվածքների նախարարությունների, կադաստրի կոմիտեի պաշտոնատար անձիք և առաջատար մասնագետներ։ Մասնավոր հատվածից՝ շինարարական խոշոր ընկերությունների և անշարժ գույքի գործակալությունների ղեկավարներ։
«Կառուցապատողների հայկական ասոցիացիա» ՀԿ-ի նախագահ Գուրգեն Գրիգորյանն իր ողջույնի խոսքում ևս կարևորեց աշխատաժողովը, դրա շրջանակում նախատեսված հանդիպում-քննարկումները․ «Այս ամենը հնարավորություն է ընձեռում ոլորտի մասնակիցներին իրականացնելու ինտերակտիվ քննարկումներ, առկա խնդիրների և դրանց համատեղ լուծումների վերաբերյալ, մեկտեղելու ջանքերը ոլորտի, հետևապես` երկրի տնտեսական զարգացման և հզորացման համար»:
Աշխատաժողովի ավարտին իմի բերելով քննարկված հարցերը և դրանց լուծման ու հասցեական իրականացման գործընթացը` որոշվել է գույքագրել ոլորտի արդի խնդիրները և նախանշել դրանց լուծման հնարավոր ուղիները, ձևավորել մասնակիցների միջև համագործակցության բարելավման գործիքներ`ստեղծել թվային հարթակ, ինչպես նաև սահմանել ոլորտի հեռանկարային ուղղությունները։
