ԱԺ խորհուրդը մերժել է արտահերթ նիստ գումարելու ընդդիմության միջնորդությունը
Ընդդիմությունը ուղերձի նախագծով արտահերթ նիստի առաջարկ էր ներկայացրել, որը իրավունքի ուժով պետք է գումարվի, եթե չեմ սխալվում, ամսի 17-ին, առաջարկ կար, որ դա տեղի ունենա ավելի շուտ, խորհուրդը չընդունեց այդ առաջարկը։ Այս մասին ԱԺ խորհրդի նիստից հետո լրագրողներին ասաց «Քաղաքացիական պայմանագիր» խմբակցության ղեկավար Հայկ Կոնջորյանը՝ անդրադառնալով ընդդիմության միջնորդությանը՝ արտահերթ նիստ հրավիրել՝ կառավարությանն անվստահություն հայտնելու օրակարգով։Հարցին՝ ի՞նչ պատճառաբանությամբ խորհուրդը չընդունեց նա պատասխանեց․ «Ուղերձի տեքստում 2 հատված կա․ կան հարցեր, որոնք քաղաքական բնույթի են՝ վերաբերվում են անվտանգային հարցերին՝ սահմանազատմանը, սահմանագծմանը և այլն։ Ես առաջարկեցի, որ մեր գործընկերները գան և վաղը մեկնարկող քառօրյայի ընթացքում հարցերը կքննարկենք և թող գան օգտվեն կառավարության հետ հարցուպատասխանի հնարավորությունից ու այդ իրենց բոլոր մտահոգություններն ուղղեն ՀՀ ընտրված վարչապետին և կառավարությանը։ Մյուս հատվածով այս ուղերձում տեղ գտած հարցի մասով մենք նման օրակարգ չունենք»։
