Մանկատան երեխաներին ծեծել են բութ առարկաներով, զրկել ջրից և բնական կարիքները հոգալու հնարավորությունից

«Փաստինֆո»-ի հաղորդմամբ՝ «Երևանի մանկան տուն» ՊՈԱԿ-ի դաստիարակը և դայակը հայտնվել են մեղադրյալի աթոռին՝ մանկատան երեխաներին պարբերաբար բռնության ենթարկելու համար։ Ըստ քրեական գործի՝ երեխաների նկատմամբ բռնությունը եղել է ինչպես ֆիզիկական, այնպես էլ՝ հոգեբանական։ Մասնավորապես, վերջիններս տարբեր բութ առարկաներով, ինչպես նաև ոտքերով և ձեռքերով անչափահասներին հարվածել և այլ բռնի գործողություններ են արել՝ ֆիզիկական ուժեղ ցավ պատճառելով, սակայն կտտանքները դրանով չեն սահմանափակվել։ Երեխաները նաև զրկանքներեն կրել` տևական ժամանակ ջրից զրկվելով, անգամ արգելվել է բնական կարիքները հոգալը, ինչը միտված է եղել կազմակերպության անչափահաս սաներին հոգեկան ուժեղ տառապանք պատճառելուն:
Նրանց մեղադրանք է առաջադրվել ՀՀ քրեական 2003թ ընդունված օրենսգրքի 119-րդ հոդվածի 2-րդ մասի 1-ին և 3-րդ կետերով՝ խմբի կազմում անչափահասի կամ հանցավորից նյութական կամ այլ կախվածություն ունեցող անձի խոշտանգման համար։ Մանկատան վերոնշյալ աշխատակիցների նկատմամբ որպես խափանման միջոց է կիրառված բացակայելու արգելքը։
Քրեական գործը Երևանի ընդհանուր իրավասության քրեական դատարանի վարույթում է գտնվում 2022թ․ փետրվար ամսից, սակայն առ այս պահը նշանակված է եղել ընդամենը 13 նիստ, որոնցից երեքը չի կայացել՝ տարբեր հիմքերով։