Միգուցե թողեք պատմության անիվը նորմալ գնա, որովհետև ինչքան փորձում եք շրջել, այդքան ավելի վատ է լինում
ԱԺ «Հայաստան» խմբակցության պատգամավոր Արթուր Խաչատրյանը, դիմելով ֆինանսների նախարար Վահե Հովհաննիսյանին, ասաց. «Խոսում եք արտագաղթի անիվը հետ պտտելու մասին։ Ինձ կասե՞ք՝ այս տարվա առաջին 6 ամսվա ընթացքում ՀՀ-ից Հայաստանի անձնագիր ունեցող քանի՞ քաղաքացի է մեկնել, սալդոյի մասին եմ խոսում»։ Ասում եք՝ աշխատատեղեր են ստեղծվել։ Ինձ խնդրում եմ ասեք այս տարվա առաջին 6 ամիսներին մասնավոր սեկտորում կրճատված աշխատատեղերի քանակի մասին»,-նշեց նա:Նախարար Հովհաննիսյանն ասաց, որ աշխատատեղերը և՛ կրճատվում են, և՛ ստեղծվում․ «Կարծում եմ՝ սա է էականը, այո՛, կարող են աշխատատեղեր կրճատվել, և մարդիկ մի տեղից տեղափոխվեն մի ուրիշ տեղ»,- ասաց նա:
Արթուր Խաչատրյանն ասաց, որ նախարարի փոխարեն ինքը կասի թվերը:
«Ուրեմն, երկրորդ եռամսյակում նոր ստեղծված աշխատատեղեր՝ 15,700, կրճատված աշխատատեղեր՝ 16,900։ Ընդ որում, մասնավոր հատվածում 12,300 աշխատատեղ ստեղծվել է, 12,700 կրճատվել է։ Այսինքն՝ դուք խոսում եք, որ ստեղծում են աշխատատեղեր, գոնե երկրորդ եռամսյակում մենք տեսնում ենք, որ աշխատատեղերը կրճատվում են»,- ասաց նա։
Խաչատրյանը նաև ներկայացրեց արտագաղթի թվերը: «Դուք խոսում եք, որ հեսա, հեսա գալու ենք շրջենք պատմության անիվը, բայց Հայաստանի Հանրապետության փաստաթղթերով բացասական սալդոն կազմում է 20,366 մարդ։ Միգուցե թողեք այդ պատմության անիվը նորմալ գնա, որովհետև ինչքան փորձում եք շրջել, այդքան ավելի վատ է լինում»,- նշեց նա:
