Ինչպես է Դոնալդ Թրամփը պատրաստվում ձեռք բերել Գրենլանդիան
ԱՄՆ նորընտիր նախագահ Դոնալդ Թրամփը լուրջ է տրամադրված Գրենլանդիան ձեռք բերելու հարցում։ Այս մասին գրում է Reuters-ը՝ հղում անելով իր աղբյուրներին։«Թրամփը հազիվ թե դիմի ռազմական ուժի՝ Գրենլանդիայի նկատմամբ վերահսկողություն հաստատելու համար: Այնուամենայնիվ, նա լրջորեն ցանկանում է օգտագործել այլ միջոցներ, ինչպիսիք են դիվանագիտական կամ տնտեսական ճնշումը Դանիայի վրա՝ աշխարհի ամենամեծ կղզին ձեռք բերելու համար»,-ասել է գործակալության զրուցակիցներից մեկը:
Թրամփի համախոհներից մեկը գործակալությանը հայտնել է, որ տեսել է նրա արտաքին քաղաքականության առաջնահերթությունների ցանկը, որի կետերից մեկը «Գրենլանդիայի գնումն» էր։
Գործակալության տվյալներով՝ Թրամփը կղզու ձեռքբերումը դիտարկում է որպես ռազմավարական անհրաժեշտություն՝ ուժեղացնելու ԱՄՆ ազդեցությունը Արևմտյան կիսագնդում և հակազդելու Արկտիկայի տարածաշրջանում Չինաստանի և Ռուսաստանի աճող ներկայությանը։ Կղզին ունի նավթի, գազի և այլ բնական հանածոների զգալի պաշարներ և ռազմավարական նշանակություն ունի ԱՄՆ պաշտպանական շահերի համար:
Reuters-ը նաև շեշտում է, որ կղզին ձեռք բերելու Թրամփի ցանկությունը նոր քմահաճույք չէ։ Նա այս գաղափարը քննարկել է դեռ 2019 թվականին՝ իր առաջին նախագահական ժամկետում։ Թրամփի համախոհներից մեկի կարծիքով՝ Գրենլանդիան ձեռք բերելու ծրագրերը կապված են նաև պատմության մեջ հետք թողնելու նորընտիր նախագահի ցանկության հետ։
