Ուկրաինայում խաղաղությունը պետք է հաշվի առնի եվրոպացիների շահերը
Ուկրաինայում խաղաղությունը պետք է հաշվի առնի եվրոպացիների շահերը, հայտարարել է Ֆրանսիայի նախագահ Էմանուել Մակրոնը Փարիզում Ուկրաինայի հարցով ԵՄ և Կանադայի մի քանի առաջնորդների երկրորդ արտակարգ գագաթնաժողովից հետո։«Ֆրանսիայի և նրա գործընկերների դիրքորոշումը հստակ և միասնական է: Մենք ցանկանում ենք, որ Ուկրաինայում խաղաղություն լինի հարատև և երկարատև: Մենք աջակցում ենք Ուկրաինային և կստանձնենք Եվրոպայում խաղաղությունը և անվտանգությունը ապահովելու բոլոր պարտավորությունները: Սա Ֆրանսիայի հիմնարար շահն է, և ես դրա երաշխավորն եմ։ Ուկրաինան միշտ պետք է դաշնակից մնա, և նրա իրավունքները պետք է հարգվեն: Խաղաղությունը պետք է լինի կայուն և ուղեկցվի հուսալի և վստահելի երաշխիքներով: Պետք է հաշվի առնել եվրոպացիների անվտանգության շահերը»,- գրել է նա:
Նրա խոսքով՝ եվրոպացի առաջնորդները կիսում են ԱՄՆ նախագահ Դոնալդ Թրամփի նպատակը՝ «վերջ դնել» հակամարտությանը։
Չորեքշաբթի հանդիպմանը մասնակցել են Իսլանդիան, Նորվեգիան, Բալթյան երկրները (Լիտվա, Էստոնիա և Լատվիա), Չեխիան, Հունաստանը, Ֆինլանդիան, Ռումինիան, Շվեդիան և Բելգիան, ինչպես նաև Կանադան։ Նրանցից շատերի ներկայացուցիչները բանակցություններին միացել են տեսակապի միջոցով։
