«Սա քերելու մշակույթն ամրապնդելուն միտված օրենք է», ՔՊ–ն դեմ քվեարկեց համընդհանուր հայտարարագրման մասին օրենքը չեղարկելուն
Աժ-ն քննարկում է ընդդիմադիր «Հայաստան» խմբակցության ներկայացրած նախագիծը, որով առաջարկվում է փոփոխություն և լրացում կատարել Հարկային օրենսգրքում: Նախագծով առաջարկում է չեղարկել համընդհանուր հայտարարագրման մասին օրենքը:
«Այն ժամանակավրեպ է դրված նպատակի տեսանկյունից ոչ լիարժեք և համարժեք իսկ քաղաքացիների համար դառնալու է նոր և ավելորդ վարչարարության անիմաստ պարտավորության և տուգանքի հիմք»,- ասաց պատգամավոր Թադևոս Ավետսիյան::
Վարման կարգով ելույթ ունեցավ «Քաղաքացիական պայմանագիր» խմբակցության ղեկավար Հայկ Կոնջորյանը, որը նշեց, որ ՔՊ-ն դեմ կքվեարկի նախագծին:
«Հայաստան» խմբակցության պատգամավոր Արթուր Խաչատրյանն էլ վարման կարգով ելույթին ասաց, որ ժողովրդին խաբում են, նախագիծը ոչ թե եկամուտների պատկերը ճշտելու նպատակ է հետապնդում այլ հավելյալ հարկեր մտցնելու նպատակ:
«Ձեր կարծիքով կառավարությունը հետաքրքրասիրությունից դրդվա՞ծ է ուզում 300 հազարից ավելի փոխանցումների մասին տեղեկատվություն ստանալ: Ո՛չ, հաջորդը հարկվելու են արտագնա աշխատանքի մեկնողները, հետո՝ գյուղատնտեսությհամբ զբաղվողները: Այս օրենքը բացարձակապես հայտարարագրման մշակույթի ու սոցիալական պաշտպանության հետ կապ չունի, սա քերելու մշակույթն ամրապնդելուն միտված օրենք է»,- ասաց նա:
«Քաղաքացիական պայմանագիր» խմբակցության պատգամավոր Վահագն Ալեքսանյանն էլ վարման կարգով ելույթին ասաց, որ ընդդիմության նպատակը մեկն է՝ այնպես անել, որ հնարավորինս քիչ քաղաքացի կարողանա օգտվել սոցիալական կրեդիտներից:
ԱԺ-ն դեմ քվեարկեց նախագծի՝ լիագումար նիստի օրակարգ ընդգրկվելու մասին հարցին:
