Ավինյանի վերահսկողները քաղաքացիների հետ խոսում են ոչ հարգալից, հաճախ՝ ագրեսիվ և «քյարթու», տուգանքներ են գրանցվում նույնիսկ առանց ստուգման․ «Ժողովուրդ»
«Ժողովուրդ» օրաթերթը գրում է. «Երեւանի տրանսպորտում տիրող իրավիճակը, հատկապես սակագնի թանկացումից հետո, օրեցօր ավելի լարված է դառնում։ Եթե իշխանությունը բարձր գինը հիմնավորում էր ծառայության որակի բարձրացմամբ, ապա իրականությունը հակառակն է. քաղաքացիները բախվում են ոչ միայն անհարմարությունների, այլ նաեւ նվաստացնող վերաբերմունքի։Վերջին օրերին Երեւանի ավագանու անդամ Մեսրոպ Մանուկյանը եւ բլոգեր Արթուր Չախոյանը դիտարկումներ են արել տրանսպորտում։ Նրանք փաստել են՝ Տիգրան Ավինյանի վարչակազմի ուղարկած վերահսկողները քաղաքացիների հետ խոսում են ոչ հարգալից տոնով, հաճախ՝ ագրեսիվ եւ «քյարթու» վարքագիծ դրսեւորում։ Տուգանքներ են գրանցվում նույնիսկ առանց ստուգման։ Չախոյանն ինքը երեկ տուգանվել է՝ առանց որեւէ ստուգման կամ հիմնավորման։
Հասարակական վերահսկողությունը, ըստ ամենայնի, վերածվել է քաղաքացիների դեմ ուղղված մեխանիզմի։ Սա լուրջ ահազանգ է. քաղաքապետարանը պարտավոր է երաշխավորել ոչ միայն վճարային կարգապահություն, այլ նաեւ արժանապատիվ վերաբերմունք իր քաղաքացիների նկատմամբ։
Թանկացած տոմսի դիմաց երեւանցին ակնկալում է ոչ թե ճնշում ու կասկած, այլ անվտանգ, հարգալից ու որակյալ սպասարկում: Մինչդեռ այսօր Երեւանում գործ ունենք տրանսպորտային քաղաքականության տապալման եւս մեկ դրսեւորման հետ, որի քաղաքական պատասխանատվությունը լիովին կրում է Տիգրան Ավինյանը. մարդ, որ արդեն ասոցացվում է ստախոսության հետ: Մինչ այս քարոզում էր՝ «ասե՛ք՝ կանե՛նք», հիմա ասում ենք՝ քո խոստացած տրոլեյբուսները գնի՛ր, ասում է՝ փող չկա, ասում ենք՝ մահվան վերելակները փոխի՛ր, ասում է՝ փող չկա: Ասում ենք՝ մարդկանց մի՛ նվաստացրու, նա ուղարկում է թաղային խուժան եւ «ախրանիկ» հիշեցնող զազրելի ժամանակների կերպարներին հանրային տրանսպորտ՝ նսեմացնելու ՀՀ քաղաքացիներին»։
Հոդվածն ամբողջությամբ կարող եք կարդալ «Ժողովուրդ» թերթի՝ 29․ 08․ 25 թ
