Թելմա Ալթուն անունով հայուհին վազելով Հայաստանից Արցախ կհասնի

 

Թելման, ծնվելով Թեհրանում, վաղ տարիքից սկսել է վազել և դա նրա մոտ այնքան լավ էր ստացվում, որ գերազանցում էր նույնիսկ տղաներին: Հետագայում նա ծնողների հետ տեղափոխվել է ԱՄՆ: Այժմ արդեն 42-ամյա Թելման, ով աշխարհի տարբեր անկյուններում մասնակցել է մարաթոնների (30-180 մղոն), երկու երեխաների մայր է և այս առանձնահատուկ կարևոր սպորտաձևում  միակ հայաստանցի ներկայացուցիչը: Թելման իր ծախսերը հոգալու հովանավորության բազմաթից առաջարկներ է մերժել միայն իր անկախությունը պահպանելու և հայ ազգի անունը հպարտորեն կրելու համար: 

Ինչպես հայտնում է Asbarez.com-ը՝ այս անգամ Թելման իր նախնիների հայրենիքում կվազի առաջին անգամ. այդ մասին նա վաղուց էր երազում: Վազքը նա կսկսի Վարդենիսից՝ Սևանա լճի մոտակայքից, և կուղևորվի դեպի Հադրութ: Հանգստի ժամերը կինը կանցկացնի քաղաքներում և գյուղերում տեղացիների հետ ծանոթանալով և շփվելով: Աղբյուրը նշում է, որ կին վազորդին կուղեկցեն երկու հեծանվորդներ և մեկ մեքենա:

«Սա իմ ազգին փոխհատուցելու միակ ձևն է: Ես վազել են աշխարհի տարբեր անկյուններում, բայց երբեք դա չեմ արել իմ մայր հայրենիքում: Եվ վերջապես եկել է ժամանակը, որ քրտինքս ու արցունքներս հայրենի հողի համար թափեմ»: