Ստեփանակերտից Երևան է տեղափոխվել երրորդ վիրավոր զինծառայողը. վիճակը ծայրահեղ ծանր է
Այսօր՝ հունիսի 19-ին, Ստեփանակերտից Երևանի ՊՆ կենտրոնական կլինիկական զինվորական հոսպիտալ են տեղափոխել հունիսի 17-ին Արցախում գլխի հրազենային թափանցող վիրավորում ստացած ևս մեկ զինծառայողի՝1997 թ-ին ծնված, ժամկետային Յուրի Զաքարյան Արմենի:
ՊՆ կենտրոնական կլինիկական զինհոսպիտալի վերակենդանացման բաժանմունքի վարիչ Գայանե Հովհաննիսյանի փոխանցմամբ՝ զինծառայողի վիճակը ծայրահեղ ծանր է, գիտակցությունը բացակայում է, արհեստական շնչառության ապարատին է միացված:
«Երևանում հետազոտությունից հետո այս պահին վիրահատության խնդիր չկա»,- ասաց նա՝ հավելելով, որ նրան Ստեփանակերտի հիվանդանոցում վիրահատել են՝ հեմատոման են հեռացրել:
Ճշտող հարցին՝ արդյոք զինծառայողի կյանքին վտանգ է սպառնում, Գայանե Հովհաննիսյանը դրական պատասխան է տվել։
