«Երևան սիթի»-ում վաճառվում է բորբոսասնկերով շոկոլադ, իսկ ՍԱՊԾ-ն անգործության է մատնված. Տեսանյութ
Հայացք մամուլի ակումբում ՀՀ Հանրային խորհուրդի անդամ, ՀՀ
ԳՆ ՍԱՊԾ պետին կից հասարակական խորհուրդի անդամ Դոնարա Ալեքսանյանը ներկայացրեց, թե
ինչպիսի խնդիրներ են ի հայտ եկել սննդամթերքի
շուկայում ու ի՞նչ գործնական քայլեր են անհրաժեշտ խնդիրները կարգավորելու համար: Անդրադարձավ
նաև թե ինչպիսի անարդյունավետությամբ է գործում ՀՀ ԳՆ ՍԱՊԾ պետին կից հասարակական խորհուրդը։«Սննդամթերքի անվտանգության պետական ծառայությունը լիարժեք չի գործում: Նորմալ սննդամթերք չի արտադրվում ու սպառողին մատուցվում: Խնդիրների մասին բարձրաձայնել եմ, սակայն ՍԱՊԾ-ից հակադարձել են, որ իրենց ձեռքերը բռնել են՝ արգելելով ստուգումները տնտեսվարողների մոտ»,-ասաց Դոնարա Ալեքսանյանը:
Նա ասուլիսին իր հետ բերել էր «Երևան սիթի» սուպերմարկետից հավատարիմ հաճախորդների համար կես գնով վաճառվող շոկոլադ: Գնելուց հետո պարզել է, որ մանկնշման մեջ նշված Սանկտ Պետերբուրգի գործարանը նման կոնֆետ չի արտադրում: Կոնֆետների նմուշները Դոնարա Ալեքսանյանը հանձնել է լաբորատորիա, նաև ՍԱՊԾ-ին: «Լաբորատորիայից ինձ պատասխանեցին, որ շոկոլադի մեջ կան բորբոսասնկեր և սնկեր, իսկ ՍԱՊԾ-ից բանավոր կերպով, ոչ պաշտոնական, առանց ստորագրության, առանց կնիքի մի կիսատ թուղթ, ըստ որի՝ կոնֆետը նորմալ է»,-ասաց նա:
Ծառայության ղեկավարի մասին դժգոհությունը Դոնարա Ալեքսանյանը ներկայացրել է նախարարին. «Նախարարի ներկայությամբ ես Իշխան Կարապետյանի երեսին ասեցի, որ ծառայությունը չի աշխատում, սպառված է, ինչ աղբ ասես, որ չի հայտնվել խանութներում: Որոշ ժամանակ անց ՍԱՊԾ-ն ոչնչացրել է պահեստում պահվող 21,5 կգ ժամկետանց կոնֆետը, երևի նախարարն է միջամտել»:
