Տարեց կնոջը վրաերթի է ենթարկել դատավորի փեսա՞ն. վարկածն ստուգվում է
Մարտի 10-ին Երևան քաղաքի Վազգեն Սարգսյան փողոցում՝ Կենտրոնական բանկի դիմաց, մահվան ելքով վթարի դեպքով մամուլում տեղեկություններ են շրջանառվում, որ տարեց կնոջը վթարի ենթարկած անձն իրականում դատավոր Գագիկ Խանդանյանի փեսան է, սակայն իրավապահներին է ներկայացել բոլորովին այլ մարդ՝ իր վրա վերցնելով վրաերթի պատասխանատվությունը։Մամուլում շրջանառվող այս վարկածը արդյոք Քննչական կոմիտեն քննության առարկա դարձրե՞լ է «Փաստինֆո»-ի հարցին ի պատասխան՝ Քննչական կոմիտեի նախագահի խորհրդական Սոնա Տռուզյանը նշեց, որ այդ վարկածը ևս քննության առարկա է դարձել, և այդ ուղղությամբ կատարվում է քննություն։
Հիշեցնենք, որ վրաերթը տեղի է ունեցել մարտի 10-ին՝ ժամը 21:15-ի սահմաններում, «Մերսեդես-Բենց» մակնիշի 999 DO 99 հ/հ ավտոմեքենայի վարորդը հետիոտնին՝ 1943թ. ծնված Մարիա Գրիգորյանին ենթարկելուց հետո թողնելով դեպքի վայրը, հեռացել է:
«Նշված վարկածն, այո, քննության առարկա է դարձվել։ Ճիշտ է, նախաքննության ընթացքում մի քաղաքացի ներկայացել է եւ հայտնել, թե ինքն է դեպքի պահին եղել «Մերսեդես-Բենց» մակնիշի ավտոմեքենայի ղեկին, սակայն ձեռնարկվում են անհրաժեշտ քննչական եւ դատավարական այլ գործողություններ՝ քաղաքացու հայտնած տվյալներն ստուգելու եւ դեպքի իրական հանգամանքները պարզելու ուղղությամբ»,- ասաց Սոնա Տռուզյանը։
Հետիոտնի մահվան դեպքի առթիվ հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածով, իրավապահներին ներկայացած անձը, ով հայտարարել է, թե ինքն է ղեկին եղել, ձերբակալվել է:
