Սահմանադրությունը չի ասում, որ ուժային կառույցները պետք է լինեն վարչապետի վերահսկողության տակ. Գորգիսյան
Սահմանադրությունը չի պարտադրում, որ ուժային կառույցները պետք է լինեն անմիջականորեն վարչապետի վերահսկողության տակ, դա չի բխում Սահմանադրությունից: Այս մասին, այսօր՝ մարտի 14-ին, լրագրողների հետ հանդիպման ժամանակ նշել է «Ելք» խմբակցության պատգամավոր Գեւորգ Գորգիսյանը:
«Ես որքան ուսումնասիրեցի, նման փորձ կարծեմ եղել է միայն Օսմանյան Կայսրությունում, որտեղ ուժային կառույցները երկրի ղեկավարին են ենթարկվել, ոչ թե կառավարությանը: Որեւէ քաղաքակիրթ երկրում ես նման փորձ չգտա: Միգուցե նաեւ Հյուսիսային Կորեայում է այդպես, ես տեղյակ չեմ»:
Նա չբացառեց, որ եվրոպական կառույցները ինչ-որ պահի կարձագանքեն այս փաստին, քանի որ սա ճանապարհ է դեպի տոտալիտարիզմ»:
«Մենք խոսել են սուպեր վարչապետի հրեշային համակարգ ձեւավորելու դեմ: Սերժ Սարգսյանի երրորդ ժամկետ գնալը տոտալիտարիզմի քայլերից մեկն է: Հարատեւ իշխանության մնալը անընդունելի է, ով էլ լինի այդ անձը»,-ասաց Գորգիսյանը:
Դիտարկմանը, որ ՀՀԿ-ն մինչեւ վերջին պահը չի ասում, թե ով է լինելու իր վարչապետի թեկնածուն, Գորգիսյանն արձագանքեց, որ ամեն բան գնում է նրան, որ դա լինելու է Սերժ Սարգսյանը: Նրա խոսքով, մինչ այդ քննարկվում էր նաեւ տարբերակ, որ վարչապետ կարող է լինել այլ անձ, իսկ Սերժ Սարգսյանը քաղաքական մեծամասնության միջոցով կկառավարի երկիրը, այդ թվում վարչապետին կվերահսկի, սակայն վերջին օրենսդրական փոփոխությունները ցույց են տալիս, որ «այսպիսի լիազորություններով վարչապետը չի կարող լինել խամաճիկ»:
