Ովքեր են այսօր հաստատված նորանշանակ երկու մարզպետները
Այսօր արդեն պաշտոնապես հաստատվեց նրանց թեկնածությունները: Ովքեր են նորանշանակ երկու մարզպետները։Գագիկ Միրիջանյանը՝ Արմավիրի մարզպետ
Մասնագիտությամբ բժիշկ, ՀՅԴ-ական Միրիջանյանը ծնվել է 1981թ. Երեւանում: Սովորել է Լ.Ն. Տոլստոյի անվան թիվ 128 միջնակարգ դպրոցում: Ավարտել է Երեւանի Մ. Հերացու անվան պետական բժշկական համալսարանի ընդհանուր բժշկության ֆակուլտետը (1998-2004թթ.): Այնուհետև կրթությունը շարունակել է նույն բուհի կլինիկական օրդինատուրայում` հանրային առողջություն եւ առողջապահության կազմակերպիչ մասնագիտությամբ:
2011-2013թթ. աշխատել է որպես Երեւանի Մ. Հերացու անվան պետական բժշկական համալսարանի բուժօգնության որակի վերահսկման բաժնի պետ: 2013թ.-2015թ. եղել է նույն համալսարանի աշխատակազմի ղեկավար: 2014 եղել է «Հանուն կյանքի» բժշկագիտության զարգացման հիմնադրամի գործադիր տնօրենը: .2014թ. եղել է «Մխիթար Հերացի» բժշկագիտության զարգացման հիմնադրամի գործադիր տնօրեն: 2015-2016 թվականներին եղել է Առողջապահության փոխնախարար։
Մամուլը գրել էր, որ երբ նրան նշանակեցին ներկայիս Աժ նախագահ Արա Բաբլոյանի որդու՝ Արման Բաբլոյանի փոխարեն՝ որպես Առողջապահության փոխնախարար, լուրջ դժգոհություն էր առաջացրել նախարարության աշխատակիցների մեջ: Վերջինս 2017 թվականի խորհրդարանական ընտրություններում ՀՅԴ ցուցակով առաջադրված է եղել Երևանի Արաբկիր, Աջափնյակ, Դավթաշեն վարչական շրջաններն ընդգրկող թիվ 2 ընտրատարածքում։
Կարեն Համբարձումյանը՝ Սյունիքի մարզպետ
Կարեն Համբարձումյանը ծնվել է 1982թ. նոյեմբերի 16-ին: Նա 2017 թվականի նոյեմբերի 5-ին նշանակված ՏԻՄ ընտրություններում ԲՀԿ ցուցակով առաջադրվել էր որպես Սիսիանի քաղաքապետի թեկնածու, սակայն մինչ ընտրությունները ինքնաբացարկի դիմում էր ներկայացրել։ Ըստ լուրերի՝ Կարեն Համբարձումյանը Սիսիանի ԲՀԿ-ական նախկին քաղաքապետ Աղասի Հակոբջանյանի փեսան է, ով համատեղ ՀԷԿ բիզնես ունի պատգամավոր Վահե Էնֆիաջյանի հետ: Ըստ մամուլի տեղեկությունների՝ վերջինիս հորը՝ Հովհաննես Համբարձումյանին, Սիսիանում որպես անգերազանցելի ընտրակեղծարար են ճանաչում։
Այսպիսով, ԲՀԿ-ն երեք մարզպետ ունի՝ Վայոց ձորում, Լոռիում, Սյունիքում: ՀՅԴ-ն եւս երեք մարզպետ ունի՝ Գեղարքունիքում, Արմավիրում, Արագածոտնում, ՔՊ-ն չորս մարզպետ ունի՝ Կոտայքում, Շիրակում, Արարատում, Տավուշում․ (Տավուշի մարզպետն անկուսակցական է, սակայն նշանակվել է ՔՊ քվոտայով)։
