Էրդողանը Բաքվում խոսել է Արցախի և Նախիջևանի մասին
Թուրքիայի նախագահ Ռեջեփ Թայիփ Էրդողանը նախագահի պաշտոնը ստանձնելուց մեկ օր հետո՝ հուլիսի 10-ին առաջին պաշտոնական այցն է կատարել Ադրբեջան: Բաքվում Էրդողանն այցելել է Հեյդար Ալիևի շիրմին, Բաքվի Շեհիդների պուրակ:Պաշտոնական արարողակարգից հետո Էրդողանն առանձնազրույց է ունեցել ադրբեջանցի պաշտոնակից Իլհամ Ալիևի հետ: Հանդիպումից հետո կազմակերպված մամուլի ասուլիսի ժամանակ Էրդողանն անդրադարձել է Արցախին և Նախիջևանին՝ նշելով, որ «Լեռնային Ղարաբաղ-Նախիջևան հարցի» հանգուցալուծման գործում արել են հնարավոր ամեն բան և հետագայում ևս այս հարցում նույն վճռականությամբ են շարժվելու:
Թուրքիա-Նախիջևան ավտոճանապարհային խնդիրների մասին խոսելիս Թուրքիայի նախագահը հայտնել է, որ դրանք հաղթահարված են, իսկ անհրաժեշտության դեպքում կարող են երկաթգիծ կառուցել:
Նշվել է, որ Էրդողանը պատրաստակամություն է հայտնել աջակցել Նախիջևանի բնակչությանն առողջապահության, կրթության հարցերում՝ նշելով, որ նախիջևանցիներն այդ ամենից կարող են օգտվել Թուրքիայի սահմանակից շրջանների համապատասխան հաստատություններում:
