Հույս դնել սփյուռքի վրա՝ անիմաստ է.սփյուռքահայը առաջին հերթին բիզնեսմեն է, հետո նոր հայ
Իշխանության և հասարակության միջև կապ է հաստատվել: Մարդիկ հույս ունեն, որ իշխանության եկած նոր ուժերը իրենց կտան «երանելի ապագա»: Այս մասին Tert.am-ի հետ զրույցում ասաց «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանը: «Ժողովուրդը հույս ունի, որ կենցաղային խնդիրները կլուծվեն նոր իշխանության հաստատմամբ, բայց որքանո՞վ են պատրաստ իշխանությունները արդարացնել այս ակնկալիքները, և արդյոք ունե՞ն նման խնդիր: Եթե իշխանություններն իսկապես պատրաստ են բավարարել ժողովրդի սպասելիքները, ուրեմն նրանց պետք է ժամանակ տալ, որ ուսումնասիրեն ռեսուրսները, կայացնեն որոշումներ, դրանք մտնեն ուժի մեջ ու գործածվեն»,- ասաց Ահարոն Ադիբեկյանը:
Սոցիոլոգը նշեց, որ նման խնդիրների լուծման համար 50-60 միլիոն դոլարի ներդրումները, ինչի մասին օրերս խոսել է նախարար Արծվիկ Մինասյանը, քիչ են, դրանք չեն լուծի ժողովրդի առաջ ծառացած խնդիրները. «Պետք է ավելի մեծ ներդրումների ներգրավման ուղղությամբ աշխատել:
Հայաստանը շատ բարդ վիճակում է: Շուկան փոքր է, ներկրումների ու արտահանումների համար խնդիրներ կան՝ տրանսպորտային: Սրան էլ գումարվում են սահմանային խնդիրները: Հույս դնել սփյուռքի վրա՝ անիմաստ է: Սփյուռքահայը առաջին հերթին բիզնեսմեն է, հետո նոր հայ: Ուստի ժամանակ է պետք տալ կառավարությանը, որ այդ ռեսուրսները գտնեն: Հավանաբար, հաջորդ տարի աշնանը արդեն պարզ կլինի՝ նոր իշխանությունները կարողանո՞ւմ են կատարել իրենց խոստումները, թե ոչ»:
Ըստ Ադիբեկյանի՝ նպաստավորը սպասում է նպաստների մեծացում, թոշակառուն՝ թոշակների ավելացում, աշխատողը՝ աշխատավարձերի բարձրացում: «Մեկ տարի սպասենք, որ տեսնենք՝ արդյունքներ կան, թե ոչ»,- հավելեց նա:
