«Արա՛, էդ իմ վրա՞ ես ծիծաղում». 29-ամյա ալավերդցին փայտով խփել-ջարդել է իրեն նկատողություն անողի գլուխը
Լոռու մարզի ընդհանուր իրավասության դատարանում Սուրեն Բաղդասարյանի նախագահությամբ ավարտվել է Կարեն Հ.-ի գործի դատական քննությունը:29-ամյա Կարեն Հ.-ին մեղադրանք էր առաջադրվել տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Ըստ մեղադրանքի՝ 2017 թվականի հոկտեմբերի 25-ին Կարեն Հ.-ն իր կնոջ հետ Ալավերդի քաղաքի մշակույթի տուն է գնացել՝ կինո դիտելու:
Կինոդիտման ընթացքում Արման Բ.-ն անցել է Կարեն Հ.-ի ու նրա կնոջ մոտով, այդ ժամանակ Կարենը ծիծաղել է, իսկ Արման Բ.-ն ենթադրել է, թե նա իր վրա է ծիծաղում ու դիտողություն է արել:
Կինոդահլիճում վիճաբանությունը չի շարունակվել, բայց նույն օրը, ժամը 21-ի սահմաններում Ալավերդու Երիտասարդական փողոցում գտնվող դեղատան մերձակայքում Արման Բ.-ն ու Կարեն Հ.-ն հանդիպել ու վիճել են: Վիճաբանության ընթացքում Կարեն Հ.-ն, ըստ մեղադրանքի, գետնից փայտ է վերցրել ու մեկ անգամ շեշտակի հարվածել է Արման Բ.-ի գլխին՝ նրա առողջությանը բաց գանգուղեղային վնասվածքի, գագաթոսկրի բազմաբեկոր, ներհրված կոտրվածքի, ձախ գագաթային բլթի միջին սալջարդի, էպիդուրալ հեմատոմայի ձևով պատճառելով ծանր վնաս:
Արման Բ.-ն գլխի վնասվածքը ստացել, ընկել է գետնին՝ ընկնելու ժամանակ ստանալով նաև թեթև վնասվածք քունքագագաթային շրջանում:
Կարեն Հ.-ն դատարանում իրեն մեղավոր չի ճանաչել: Նա ասել է, թե տուժողին հարվածել է վախից, ցանկացել է պաշտպանվել, երբ տուժողի ձեռքին տեսել է «լոմիկ»: Այսինքն՝ Կարեն Հ.-ն ընդունել է, որ Արման Բ.-ին ինքն է հարվածել, բայց պնդել է, թե ծանր վնասվածք հասցնելու դիտավորությամբ չի խփել:
Ըստ Կարենի՝ դեպքի օրն ինքը կնոջ հետ գնացել է կինո: Մինչև ֆիլմի սկսվելը իրենք զրուցել ու ծիծաղել են: Արման Բ.-ին էլ թվացել է, թե իր վրա են ծիծաղում: Նա հարցրել է. «Արա՛, էդ իմ վրա՞ ես ծիծաղում, ա՛յ տղա»: Ինքը պատասխանել է. «Հետս կարգին խոսա, քո վրա ծիծաղող չկա»:
Ֆիլմի վերջանալուց հետո գնացել են տուն: Ինքը երեխայի համար պիտի մանկական կեր գներ, խնդրել է, որ ընկերը մեքենայով իրեն տանի այդ ժամին բաց դեղատուն: Մինչ այդ՝ Արման Բ.-ն զանգել է իրեն ու հանդիպում է պահանջել: Ինքը նրա ասածը բանի տեղ չի դրել:
Երբ գնացել են Ալավերդու հիվանդանոցի մոտ գտնվող դեղատուն, ինքն իջել է ընկերոջ մեքենայից, իսկ ընկերը շրջադարձ է կատարել: Այդ վայրում ինքը պատահական տեսել է Արման Բ.-ին: Մոտեցել է՝ ցանկանալով հարցնել՝ ինչո՞ւ իր կնոջ ներկայությամբ իր հետ վատ տոնով խոսեց ու դիմեց «արա»-ով:
Արմանն այդ ժամանակ իրեն հայհոյել է: Ինքը նրա թևքի մեջ նկատել է «լոմիկ», վախեցել է, ինքնապաշտպանության մղումով մի քայլ հետ է գնացել, տեսել է աղբամանի մոտ ընկած փայտի կտորը, վերցրել ու խփել է Արմանի գլխին: Նա վայր է ընկել: Ինքը հեռացել է դեպքի վայրից, իսկ իր ընկերները Արմանին տարել են հիվանդանոց:
Ըստ դատական ակտի՝ նախաքննության ընթացքում Կարեն Հ.-ն իրեն լիովին մեղավոր է ճանաչել: Նա չի հայտնել Արման Բ.-ի մոտ «լոմիկ» տեսնելու մասին: Տուժողի հետ առերես հարցաքննության ժամանակ տուժողն ասել է, թե Կարենին տեսնելով՝ վախեցել, մեքենայից «լոմիկ» էր վերցրել, թաքցրել թևքի մեջ՝ ապահովության համար: Այդ հարցաքննությունից հետո Կարենը հետագա ցուցմունքներում սկսել է պնդել, թե Արմանի ձեռքին «լոմիկ» տեսնելով՝ վախեցել ու ինքնապաշտպանության մղումով է նրա գլխին հարվածել փայտով:
Դատարանն արձանագրել է, որ տուժողը Կարեն Հ.-ի նկատմամբ լինգ գործադրելու նույնիսկ փորձ չի կատարել… Այդ մասին հայտնել է տուժողը՝ չնայած լինգը թևքի մեջ էր դրել, բայց հարվածելու նպատակ չուներ… Լինգը վերցրել էր միայն վախեցնելու նպատակով:
Ըստ տուժողի՝ երբ ինքը հայհոյել է Կարենին, նա գետնից փայտ է վերցրել ու խփել է իր գլխին, ինքն ընկել ու այլևս ոչինչ չի հիշում: Արթնացել է հիվանդանոցում… Իրեն հիվանդանոց են տեղափոխել Կարենի ընկերները…
Տուժողը բողոք չի ներկայացրել ամբաստանյալի դեմ:
Տուժողի հայրը հայտնել է, թե Կարենի հարազատները հավաստիացրել են, թե կհոգան հիվանդանոցային ծախսերը: Նրանք հատուցել են առաջին վիրահատության ծախսերը, վճարել են 1 միլիոն 100 հազար դրամի չափով, խոստացել են հատուցել նաև երկրորդ վիրահատության ծախսերը՝ 839 հազար դրամ, և հատուցել են: Ամբաստանյալից պահանջ, բողոք չունեն:
Դատարանը հաշվի է առել, որ Կարեն Հ.-ի խնամքին են երկու մանկահասակ երեխաները, տուժողի բուժման ծախսերն ամբողջությամբ հատուցվել են, ամբաստանյալի արարքը պայմանավորված է եղել նաև տուժողի հակաօրինական, հակաբարոյական վարքագծով, տուժողը և նրա ներկայացուցիչը ամբաստանյալի դեմ բողոք չեն ներկայացրել:
Կարեն Հ.-ն մեղավոր է ճանաչվել ՀՀ քրեական օրենսգրքի 112 հոդվածի 1-ին մասով, դատապարտվել է 3 տարի ազատազրկման, այդ պատիժը պայմանականորեն չի կիրառվել, սահմանվել է 2 տարի փորձաշրջան:
