Տեսանյութ. Սկանդալ և «բեսպրեդել» Պուտինի անվան մրցաշարում. Ինչպես են հայ բռնցքամարտիկից խլում հաղթանակը
Խոշոր սկանդալ է ծագել Սոչիում Ռուսաստանի նախագահ Վլադիմիր Պուտինի անվան գավաթի խաղարկության շրջանակներում տեղի ունեցած պրոֆեսիոնալ բռնցքամարտի երեկոյի ժամանակ:Օրվա գլխավոր մարտում թեթև քաշային կարգի քառորդ եզրափակչում միմյանց հետ են մրցել Ռուսաստանը ներկայացնող մեր հայրենակից Վահե Սարուխանյանը և Պավել Մալիկովը: Վերջինս ռուսական բռնցքամարտի առանցքային ֆիգուրներից է և մեծ հեղինակություն ունի իր հայրենիքում: Մրցամարտն անցավ լարված և դիտարժան պայքարում: Սարուխանյանն ուներ առավելություն, և երկրպագուների մեջ կասկած չէր հարուցում, որ հայ բռնցքամարտիկը իր կարիերայի կարևորագույն հաղթանակներից մեկը կտանի: Մասնավորապես, Սարուխանյանն անհամեմատ ավելի ակտիվ էր, դիպուկ, իսկ հարվածների քանակով ակնհայտ առավելություն ուներ: Մարտի ավարտից հետո Սարուխանյանը, վստահ լինելով, որ հաղթել է, մարզիչներից և երկրպագուներից շնորհավորանքներ էր ստանում:
Մալիկովն իր հերթին այնքան էլ գոհ չէր իր անցկացրած մարտից և օբյեկտիվորեն պատրաստ էր ընդունելու պարտությունը: Մենամարտի ավարտից հետո հայտարարվեց, որ մրցավարները գրանցել են ոչ-ոքի արդյունք՝ 96-92, 92-96, 94-94: Ավելին, մենամարտի լրացուցիչ մրցավարը 95-93 հաշվով հաղթանակ շնորհեց ռուս բռնցքամարտիկին, որը դուրս եկավ կիսաեզրափակիչ:
Հաղթողի անունը հայտարարելուց հետո մարզադահլիճում իրարանցում սկսվեց, և կրքերը բորբոքվեցին: Վրդովված Սարուխանյանը փորձեց իր կարծիքն արտահայտել տեղի ունեցածի վերաբերյալ: Այդ պահին, սակայն, ռինգում հայտնվեց Punch Boxing պրոմոութերական ընկերության հիմնադիր, Հայաստանի բռնցքամարտի ֆեդերացիայի փոխնախագահ Արամ Դավթյանը: Վերջինս հանդես եկավ աղմկահարույց հայտարարությամբ: «Տղերք, ամեն ինչ տեղի ունեցավ այնպես, ինչպես սովորաբար լինում է Ռուսաստանում: Ոչ մի նոր բան, ամեն ինչ գնում է նախկինի պես, և չկա որևէ հեռանկար: Վահեն մաքուր հաղթանակ տոնեց: Մնացածը ոչ մեկին չի հետաքրքրում: Սա Վահեի հաղթական մենամարտն էր, և ես պատրաստ եմ դա ապացուցել: Ամոթ մրցավարներին»,- հայտարարել է Դավթյանը:
Տեղի ունեցածն իսկապես խայտառակություն է, որը ստվեր գցեց Ռուսաստանի նախագահի հովանու ներքո անցկացվող մրցաշարի վրա: Սոցիալական ցանցերում տեղի ունեցածը լայն արձագանք է ստացել: Սարուխանյանի երկրպագուները պահանջում են չեղյալ համարել մրցավարների որոշումը և հաղթանակը շնորհել հայ բռնցքամարտիկին: Կատարվածին կոշտ են արձագանքել նույնիսկ ռուսական լրատվամիջոցները՝ փաստելով, որ Սարուխանյանից ուղղակի խլել են հաղթանակը:
«Լյուբերցի քաղաքի «աստվածը»՝ Մալիկովը, ամբողջ մենամարտի ընթացքում փորձում էր սադրել Սարուխանյանին և «կռիվ սարքել»: Հայ բռնցքամարտիկը, սակայն, պտտվելով ռինգի շուրջը, ճկուն կերպով խուսափում էր ընդհարումից՝ ստիպելով Մալիկովին սխալներ թույլ տալ և շեղ հարվածներ կատարել: Ավելին, Սարուխանյանի պոռթկումները բավական տպավորիչ էին: Մարտավարական տեսանկյունից Սարուխանյանը, կարելի է ասել, անթերի գործեց: Ըստ էության Մալիկովը շահեց միայն 3-րդ և 5-րդ ռաունդներում: Մնացած բոլոր ռաունդներում Սարուխանյանը մաքուր հաղթանակ է տոնել: Իսկ ահա 8-րդ ռաունդում տեղի ունեցավ մրցավարության խայտառակ որոշումներից մեկը: Սարուխանյանն ուղղակի ցած ընկավ, իսկ մրցավարները անսպասելիորեն նոկդաուն հաշվեցին: Նույնիսկ բռնցքամարտից չհասկացողների համար պարզ էր, որ տվյալ դրվագում նոկդաուն տեղի չի ունեցել: Նշենք նաև, որ Սարուխանյանի հարվածները շատ ավելի դիպուկ էին և ուժեղ: Վերջին ռաունդում հայ բռնցքամարտիկին հաջողվեց վայր գցել մրցակցին: Այս դեպքում, սակայն, ռինգի մրցավարը, չգիտես ինչու, չգրանցեց նոկդաուն: Եթե առաջին դեպքում նոկդաունի մասին խոսք լինել չէր կարող, ապա երկրորդ դրվագը միանգամայն վիճելի էր: Մենամարտից հետո մրցավարները կայացրին անհեթեթ որոշում: Դժվար է ասել, թե ինչ սկզբունքով են նրանք հաշվել միավորները: Տեղի ունեցածը ուղղակի խայտառակություն էր: Ո՞վ է 4-րդ լրացուցիչ մրցավարը: Նրա մասին նախապես որևէ տեղեկություն չի եղել: Նրա գոյության մասին տեղյակ չեն եղել նաև մեկնաբանները, որոնք անհարմար դրության մեջ հայտնվեցին: Իրականում դժվար է մեկնաբանել տեղի ունեցածը: Աբսուրդ, որի հետևանքով «բեսպրեդելի» գնով հաղթանակը նվիրեցին Մալիկովին»,- գրել է ռուսական vringe.com պարբերականը:
Ինչևէ, Սոչիում տեղի ունեցած բռնցքամարտի երեկոյի միակ լուսավոր կողմը թերևս Հայաստանը ներկայացնող WBO վարկածով աշխարհի երիտասարդների չեմպիոն Գոռ Երիցյանն էր: Նա հերթական փայլուն մենամարտը անցկացրեց՝ տոնելով 10-րդ անընդմեջ հաղթանակը: Մասնավորապես, արդեն առաջին ռաունդում Գոռ Երիցյանը նոկաուտով հաղթանակի հասավ արգենտինացի Մաքսիմիլիանո Լեոնել Սքալզոնեի նկատմամբ: Կարիերայի ընթացքում Երիցյանը չի կրել ոչ մի պարտություն և պրոֆեսիոնալ բռնցքամարտի ամենատաղանդավոր ու հեռանկարային կադրերից մեկն է:
