Տեսանյութ.Փաշինյանի հրաժարականը պահանջող քաղաքացիները կառավարական ամառանոցի մոտ են          Եթե ԱՄՆ-ն ցանկանում է վատթարացնել հարաբերությունները՝ ճանաչելով Հայոց ցեղասպանությունը, ապա որոշումն իրենցն է       Ռուսաստանը խնդիր չունի՝ անհրաժեշտության դեպքում կարող է գնել թուրքական ԱԹՍ-ներ    

19 փետ 2019 17:29

Սեդրակ Քոչարյանը հրաժարվել է ցուցմունք տալ. պաշտպանական կողմը չի ընդունում մեղադրանքները

Սեդրակ Քոչարյանը հրաժարվել է ցուցմունք տալ. պաշտպանական կողմը չի ընդունում մեղադրանքներըՀՀ երկրորդ նախագահ Ռոբերտ Քոչարյանի ավագ որդին՝ Սեդրակ Քոչարյանը չի ընդունում իրեն առաջադրված առանձնապես խոշոր չափերով հարկ չվճարելը կազմակերպելու և առանձնապես խոշոր չափերով հանցավոր ճանապարհով ստացված եկամուտներն օրինականացնելու վերաբերյալ մեղադրանքը։ Այս մասին NEWS.am–ին հայտնեց Սեդրակ Քոչարյանի պաշտպան Հայկ Ալումյանը։
Նա նշեց, որ քրեական գործի հարուցումից հետո նախաքննական մարմինը փորձել է հարցաքննել իր պաշտպանյալին, սակայն վերջինս օգտվելով իր դատավարական իրավունքից՝ հրաժարվել է ցուցմունք տալ։

«Բոլորի համար պարզ է, որ մենք այդ կառույցին չենք վստահում բոլոր այն գործերով, որոնք վերաբերվում են պարոն Քոչարյանին կամ նրա ընտանիքին, այդ կառույցը նրանց նկատմամբ հետապնդումների գործիք է դարձել»,–ասաց նա։
Պաշտպանի կարծիքով՝ իրավապահները սխալ են մեկնաբանում ստացված եկամուտներն օրինականացնելու հանցակազմի իմաստը.
«Ցանկացած դեպքում, երբ հայտնաբերում են ենթադրյալ  հարկային իրավախախտում, հետո երբ տեսնում են, որ չվճարված հարկերի գումարով անձը որևէ բան է ձեռք բերել, համարում են, որ գործ ունեն փողերի  լվացման հետ, դա  շատ սխալ պատկերացում է այս հանցակազմի վերաբերյալ»,–ասաց նա՝ նշելով, որ Վճռաբեկ դատարանն ունի որոշում, որին հակասում է փողերի լվացման մասով Սեդրակ Քոչարյանին առաջադրված մեղադրանքը։
Նա նշեց, որ պաշտպանական կողմը չի ընդունում նաև առանձնապես խոշոր չափերով հարկ չվճարելը կազմակերպելու մեղադրանքը։
Նշենք, որ Սեդրակ Քոչարյանի նկատմամբ, որպես խափանման միջոց ընտրվել  չհեռանալու մասին ստորագրությունը։
Ալումյանի խոսքով՝ Սեդրակ Քոչարյանի նկատմամբ անգամ այս  խափանման միջոցն ընտրելու անհրաժեշտություն չկար, քանի որ ըստ նրա՝ որևէ վտանգ չկա, որ Քոչարյանը կարող է ոչ պատշաճ վարքագիծ դրսևորել։
 Հիշեցնենք որ այսօր՝ փետրվարի 19–ին ԱԱԾ–ն Սեդրակ Քոչարյանին մեղադրանք է առաջադրվել Քրեական օրենսգրքի 38-205-րդ հոդվածի 2-րդ մասով և 190-րդ հոդվածի 3-րդ մասի 1-ին կետով՝ առանձնապես խոշոր չափերով հարկ չվճարելը կազմակերպելու և առանձնապես խոշոր չափերով հանցավոր ճանապարհով ստացված եկամուտներն օրինականացնելու համար։
Ըստ հաղորդագրության, քրեական գործով հաստատված փաստական տվյալների համաձայն՝ վերջինս կազմակերպել և ղեկավարել է իր հիմնադրած ՍՊ ընկերություններից մեկի պատասխանատու աշխատակիցների կողմից օրենքով սահմանված, հարկման համար հիմք հանդիսացող հաշվարկում ակնհայտ կեղծ տվյալներ մտցնելու և առանձնապես խոշոր չափերով եկամտային հարկ չվճարելու գործընթացը, որից հետո, նպատակ ունենալով խեղաթյուրել հանցավոր ճանապարհով ստացված առանձնապես խոշոր չափերով եկամտի՝ պետական բյուջե չվճարված հարկի ծագման աղբյուրը և իրական բնույթը, այն օրինականացրել է մի շարք բանկային փոխանցումների, այդ եկամուտները գույքի ձեռքբերմանն ուղղելու եղանակով։

Մեկնաբանություններ

Համընկնող լուրեր