Տեսանյութ. Փաշինյանից պահանջում եմ ասել, թե ովքեր են այդ օտարերկրյա գործակալները, որոնք ՀՀ-ում զբաղված են պետականաքանդ գործունեությամբ
Հայաստանի Հանրապետական կուսակցության խոսնակ Էդուարդ Շարմազանովը ֆեյսբուքյան ուղիղ եթերում այսօր հայտարարեց, որ վարչապետ Նիկոլ Փաշինյան պետք է անուններ տա, թե ովքեր են օտարերկրյա գործակալները: «Օրեր առաջ Նիկոլ Փաշինյանը, որն այլևս ոչ թե ընդդիմադիր պատգամավոր է, այլ փաստացի պետության ղեկավարը, որին ենթարկվում են ուժային կառույցները՝ ոստիկանություն, ԱԱԾ, Իրանում արեց կարևոր հայտարարություն, նա նշեց, որ պետք է մերժվեն այն քաղաքական գործիչները, որոնք ավելի շատ օտարերկրյա գործակալներ են, քան ՀՀ քաղաքացիներ»,-ասաց նա:
Շարմազանովը նշեց, որ այս հայտարարությունից հետո անցել է երկու օր, և Փաշինյանն ու նրա շրջապատը որևէ քաղաքական գործչի անուն չի տվել, թե ովքեր են օտարկերյա գործակալները:
«Ես՝ որպես 4-րդ, 5-րդ, 6-րդ գումարումների ԱԺ նախագահի տեղակալ և ՀՀ արժանապատիվ քաղաքացի, պահանջում եմ վարչապետ Փաշինյանից՝ ովքե՞ր են այդ օտարերկրյա գործկալները, որոնք ՀՀ-ում զբաղված են պետականաքանդ գործունեությամբ: Փաշինյանն այլևս ընդդիմադիր Նիկոլը չէ, որ Ազգային ժողովի ամբիոնից օդում կախված լուրերի մասին հաղորդում տա: Իրանում Փաշինյանի հայտարարությունը հանցագործության մասին հաղորդում էր»,-ասաց նա:
